4-sunod sa Texters

MANILA, Philippines -  Matapos makabangon mula sa 29-point deficit laban sa NLEX ay nalampasan naman ng TNT Ka­tropa ang matinding hamon ng Mahindra.

Kinailangan ng Tropang Texters ng malakas na opensiba sa fourth quarter para lusutan ang Floodbuster, 86-84 sa 2017 PBA Commissio­ner’s Cup kagabi sa Mall of Asia Arena sa Pasay City.

Kumulekta si import Donte Greene ng 24 points, ang 11 dito ay kanyang ibinuhos sa payoff period, at 14 rebounds para sa pang-apat na sunod na ratsada ng TNT Katropa matapos ang 0-1 panimula.

Nalasap naman ng Mahindra ang kanilang pang-limang kabiguan sa anim na laro.

Nagdagdag si Troy Rosario ng 11 markers, habang may 10 points si point guard Jayson Castro para sa 4-1 baraha ng Tropang Texters.

“At least it wasn’t a come-from-behind win this time,” sabi ni TNT Katropa head coach Nash Racela. “I told them at the half that this was the time to build, develop your habits. Today we were able to do that, although there were a lot of mistakes pa rin.”

Nakadikit ang Mahindra sa 81-84 sa huling 1:24 minuto ng final canto matapos makabangon buhat sa 11-point deficit, 38-47 sa halftime.

Sa natitirang apat na segundo ay isinalpak ni Greene ang dalawang free throws para muling ilayo ang Tropang Texters sa 86-81 kasunod ang three-point shot ni Floodbuster import Keight Wright para sa final score.

Kumamada si Wright ng 26 points para pangunahan ang Mahindra kasunod ang 20 at 17 markers nina LA Revilla at Alex Mallari, ayon sa pagkakasunod.