Towns, Wiggins ibinandera ang Timberwolves

MINNEAPOLIS - Ipinakita ni Karl-Anthony Towns ang kanyang dominasyon sa maliit na fronline ng Portland Trail Blazers.

Humakot si Towns ng 34 points at 12 rebounds para banderahan ang Minnesota Timberwolves sa 110-109 panalo laban sa Blazers.

Nagdagdag si Andrew Wiggins ng 29 points para sa pangatlong panalo ng Minnesota sa huling apat nilang laro at ika-31 sa 76 asignatura, habang nagtala si guard Ricky Rubio ng 11 points at 16 assists.

“They’re playing small, we have a big who can guard smalls and play like a big at the other end,” sabi ni Rubio kay Towns. “That’s big for us.”

Nanggaling ang Timberwolves sa kabiguan sa Sacramento Kings.

Nagwakas naman ang six-game winning streak ng Blazers, nakahugot kay Damian Lillard ng 25 markers, samantalang nag-ambag si Al Farouq Aminu ng 20 points.

Naglista si Lillard ng 3-of-11 shooting sa three-point line, habang tumalbog naman ang kanyang potensyal na game-winning pull-up jumper.

Kasalukuyang nasa No. 8 spot ang Portland sa Western Conference sa kanilang 38-39 win-loss card, habang nag-ambag sina Maurice Harkless at CJ McCollum ng tig-17 points.

Ito ang ikalawang pagkakataon na hindi naglaro ang may fractured right leg injury na si big man Jusuf Nurkic para sa Blazers.