Sekreto sa tag-as og kinabuhi (3)
Nia pa ang mga ‘super centenarian’ nga nipadayag sa ilang sekreto ngano unsay gibuhat nga nakaabot man nga nakapahimulos og taas-taas nga kinabuhi.
* Si Jeane Calment (122), babaye’ng adunahan taga-France, nitug-an sa sekreto niya nga aron motaas ang kinabuhi, dili palabi magpadala sa kalibog ning kinabuhia, kay makaugtas nga madaut ang maayong panghunahuna. Moinom og diyotay nga bino (wine) ug 2 ka libras nga tsokolate kada semana. Unya kanunay sab ang lawas banyosan o pahiran og ‘olive oil.’
*Si Christian Montensen (115), niya pa, ang kinabuhi nga limpyo ang pagkatawo, mahigalaon sa isig-katawo, moinom og lunsay nga tubig ug himuong kalingawan ang pagkanta, tanan maoy iyang gibuhat nga pataas sa kinabuhi.
* Si Besse Cooper (116) Amerikanang maestra, niingon sab nga kinahanglan gawasnon sa mga gimbuhaton sa kaugalingon, dili manghilabot sa katungod sa uban, ug likayan ang makadaut nga pagkaon, sama sa ‘junkfoods.’
*Si Susannah Mushatt Jones (116), niya pa ang sekreto mao ra ang walay bisyo, dili moinom og makahubog, walay ‘make-up’, mamahaw og kan-on nga may itlog ug 4 ka hiwa sa ‘bacon’ kada adlaw.
* Si Emma Morano (117) Italyanang kinatas-a’g edad, niingon sa sekreto niya ngano nakaabot siya sa maong edad, ang yawe sa kahimsog mao ang pagkao’g 3 ka itlog kada adlaw, permi nga positibo sa kinabuhi, diyotay nga paglad-ok sa ‘brandy’, ginagmay nga pag-ingkib sa tsokolate ug mapahiyumon.
* Si Emiliano Mercado del Toro (115) natibong Puerto Rican, sa iya sab nga sekreto, ang pagkao’g ‘Funche’. Unsa man ni? Kan-ong mais, sinahoga’g bakalaw o ‘codfish’ ug gatas sa lubi. Ang wa maanad ini mora’g lud-on.
- Latest