Freeman Opinion ( Leaderboard Top ), pagematch: , sectionmatch: 1

Nagliniwatay ra sila

Nganong nisibat man si David Lim Jr. nga maoy gipasanginlang nakapusil sa nurse nga si Ephraim Nuñal tungod sa ilang lalis sa trapiko niadtong alas-3 sa kadlawon sa Domingo sa Kamputhaw, Cebu City? Nga mahimo ra man unta siyang mosurender sa kapolisan ug moangkon og resposibilidad sa iyang nahimo?

Nganong gipili man niya ang pagtagu-tago dinhi sa Sugbo (kon tuohan ang Buro sa Imigrasyon nga wa magamit ang iyang pasaporte sa niaging 48 ka oras) o sa Hong Kong (kon tinuod ang kasayuran nga nakasakay siya sa flight gikan sa Mactan paingon sa Hong Kong niadtong Domingo sa udto, siyam ra ka oras human sa duguong insidente)?

***

Samang mga pangutana ang ikapasupot sa iyang amahan nga si David Lim Sr. kinsa gipasanginlang nakabangga ug nakapatay og lalaking nag-motorsiklo sa flyover sa Archbishop Reyes Ave. sa alas-3 sa kadlawon niadtong Marso 11:

Nganong nisibat man siya nga mahimo ra man untang motabang pag-atiman sa biktima, mopaabot sa mga imbestigador sa kapolisan ug mopasabot unsay hinungdan sa bangga? Nganong gipili man ang nagusbat niyang sakyanan inay pamatud-an sa mga imbestigador nga wa siya mahubog ni magpaturagas sa pagpadagan?

***

Freeman ( Article MRec ), pagematch: 1, sectionmatch:

Mas lisod sabton ang managsamang pagtalikod sa anak ug amahan sa ilang responsibilidad nga mahimo ra man gyod unta sila nga mopiyansa dayon nga di kinahanglan nga mogahin og bisan usa lang ka gutlo sud sa prisohan.

Sama ba si David Sr. sa ubang iresponsableng mga ginikanan nga nipadako sa ilang mga anak uban ang sayop nga pasalig nga hawod sila ug di angay’ng mahadlok ni bisan kinsa? Ug sama ba si David Jr. sa ubang utu-uto nga mga anak nga nipaundayon sa binuang sa mga ginikanan?

***

Nahadlok ko nga ang tinuod nga hinungdan nga gihimo nilang David Sr. ug David Jr. ang ilang gihimo mao ang yanong pagtuo nga mahimo nila bisan unsay ganahan nilang himuon. Busa way arang nila bisan kinsay maigo sa bisan unsa nilang mahunahunaan.

Nabalaka ko nga nisunod si David Jr. sa nahaunang salida sa iyang amahan nga si David Sr. Labaw kong nabalaka nga si David Sr. nadasig kay way nakatandog sa iyang maguwang nga si Peter Lim.

leo_lastimosa@abs-cbn.com.

Freeman ( Article MRec ), pagematch: 1, sectionmatch:
  • Follow Us: