Foton kakaliskisan ang Kobe Shinwa sa superliga
MANILA, Philippines - Unang mapapalaban ang two-time Grand Prix champion na Foton laban sa Kobe Shinwa Women’s University sa pagsisimula ng final round ng Philippine Superliga (PSL) Invitational Conference ngayong araw sa The Arena sa San Juan City.
Magpapang-abot ang Tornadoes at Koe Shinwa sa alas-7 ng gabi, habang masisilayan naman ang bakbakan ng Petron at Cignal sa alas-5 ng hapon.
Maglalaro rin ang Generika-Ayala at Sta. Lucia Realty sa alas-3 sa classification round.
Malaking dagok sa panig ng Foton ang pagkawala ni team captain Dindin Santiago-Manabat na nagtamo ng grade 2 MCL sprain at partial ACL tear sa huling araw ng eliminasyon noong nakaraang linggo.
Hindi na makapaglalaro sa mga huling araw ng komperensiya si Santiago-Manabat dahilan upang maiwan ang mabigat na pasanin kay three-time NCAA MVP Grethcel Soltones, isa sa top scorers ng Tornadoes.
Kailangan din ng solidong suporta mula kina middle blockers Maika Ortiz at Katherine Villegas gayundin kina Mary Grace Berte, Cherilyn Sindayen, Iumi Yongco, Rubie De Leon, Ivy Perez at libero Jen Reyes.
Mangangapa rin ang Tornadoes dahil wala itong ideya sa Kobe Shinwa.
Ngunit alam ni Serbian mentor Moro Branislav na mabilis gumalaw ang mga Japanese players.
“I know this Japanese team is very good. We’ll just do our best,” pahayag ni Branislav.
Sa kabilang banda, tiwala si Petron mentor Shaq Delos Santos na maipagpapatuloy ng kanyang bataan ang impresibong laro.
Tinapos ng Blaze Spikers ang eliminasyon na may malinis na 5-0 baraha.
At ito ang motibasyon ng Petron upang mapanatiling imakulada ang kanilang rekord.
Hahataw para sa Blaze Spikers sina Mika Reyes, CJ Rosario, Ces Molina, Mina Aganon at Aiza Maizo-Pontillas kasama ang beteranong setter na si Rhea Dimaculangan.
Tatapatan naman ito ng HD Spikers sa pangunguna nina Jovelyn Gonzaga, Royse Tubino at Rachel Anne Daquis.
Maglalaban-laban ang Petron, Cignal, Foton at Kobe Shinwa sa final round sa isang round-robin format.
Ang koponang makalilikom ng pinakamaraming panalo ang siyang tatanghaling kampeon.
- Latest