AFP alerto vs NPA anniv.

MANILA, Philippines -  Inalerto na ni Armed Forces of the Philippines (AFP) Chief of Staff Gen. Eduardo Año ang tropa ng militar kaugnay ng pagdaraos ngayong araw ng ika-48 taong anibersaryo ng  New People’s Army (NPA) sa bansa.

“As far as we are concerned we continue to run after them  and conduct operations all over the country,” ani Año dahil karaniwan na umanong naghahasik ng karahasan ang NPA rebels bilang sagisag ng kanilang anibersaryo.

Ang NPA ang armed wing ng Communist Party of the Philippines-National Democratic Front (CPP-NDF).

Hamon ng AFP chief sa liderato ng NDF, na kontrolin ang kanilang mga armadong tauhan bilang patunay na sinsero ang komunistang grupo sa isinusulong na peace talks ng pamahalaan.

Binatikos ni Año ang pagkakasangkot ng NPA sa extortion, panununog ng mga establisimyento, construction equipment at maging sa pananabotahe ng mga farm.

Sinabi naman ni AFP Public Affairs Office Chief Col. Edgard Arevalo na dapat magnilay ang NPA sa kanilang buhay sa hindi magandang idinudulot ng armadong pakikibaka laban sa pamahalaan at epekto nito sa taumbayan.

Sa kabila nito, iginiit ni Arevalo na hindi na maikokonsiderang dapat katakutang puwersa ang NPA rebels.

“Given the serious degradation of the strength and followings of the NPA, we deem it no longer a force to recon with as compared to  the ‘70s and the ‘80s,” sabi pa ng opisyal.