PRO-7 dili magpapilit og “drug free” stickers

CEBU, Philippines - Wala pay nadawat nga kamanduan gikan sa ilang labaw ang director sa Police Regional Office-7 kabahin sa pagpapilit og stickers sa kabalayan nga nagtangag og drug free.

Gipahibawo ni PRO-7 director Noli Taliño nga bisan usa ka instruction o memorandum wala pa silay nadawat gikan sa ulohan nilang buhatan.

Ang Department of Interior and Local Government (DILG) unang miingon nga aduna silay himoon nga bag-ong paagi sa pagtubag sa problema sa drugas pinaagi sa pagbutang og stickers sa mga balay.

Ang maong lakang nahimo human gisuspenso sa presidente ang kampanya kontra drugas sa kapolisan o ang Oplan Tukhang.

Giangkon ni Taliño nga human nasuspenso ang maong programa, wala na siya masayod kun unsa ang ilang papel sa kampanya batok drugas, apan kun dunay mando nga ilang madawat sa ubang programa ila sab kining suportahan.

Alang ni Taliño daku og tabang ang plano sa DILG aron mas dali makita ang mga balay nga drug free na. Gitug-an sab niini nga human nasuspenso ang tukhang, nakadawat sila og daghang reports nga ang mga tawo nga nalista nga high value target sa ilang buhatan, nagpakita na og balik.

Matud niya nga ang gimbuhaton sa kapolisan karon mao ang paghatag sa maong impormasyon ngadto sa Philippine Drug Enforcement Agency (PDEA) alang sa insaktong lakang nga himoon. (BANAT NEWS)