Padayong pagbarug sa CBCP
Niang kabahin sa opisyal nga pamahayag sa Catholic Bishops Conference of the Philippines sa gubat sa drugas:
Nabalaka kaming mga Obispo sa kadaghan sa nangamatay sa gubat sa droga. Dakong problema ang droga. Kinahanglang sumpuon. Apan ang sulbad wa sa pagpatay sa gidudahang mga durugista. Wa lang mi mabalaka tungod sa mga gipatay, nabalaka sab sa mga pamilyang nahibilin. Daghan sang nakabsan sa kinabuhi nga di droga ang hinungdan. Ang mga nagpatay wa kapaningli sa krimen. Labaw namong gikabalak-an ang kahimtang sa kadaghanan nga wa na mahasol ning kahiwian.
***
May mga pagtulun-an nga naggiya sa atong baruganan:
1. Ang kinabuhi sa tawo Gasa sa Dios ug Dios lang ang makabawi. Way katungod ang gobyerno pagkutlo sa kinabuhi kay piniyalan lang siya, di tag-iya ini.
2. Dili kawad-an sa kahigayonan nga magbag-o ang tawo kay ang Dios maluloy-on, ingon sa gisubli-subling pagtulun-an ni Santo Papa Francisco.
3. Ang pagdaot sa kinabuhi dakong sala ug makaguba sa katilingban. Ang paggamit og droga timaan sa way paghatag og bili sa kinabuhi. Magtinabangay ta pagsulbad sa droga.
4. Matag usa may katungod nga isipong way sala hangtod mapamatud-an nga sad-an. Kinahanglang sundon ang proseso pagdakop, paghusay, ug pagsilot sa nakahimog krimen.
***
1. Bug-at nga sala ang pagbaligya og droga ug bug-at nga sala ang pagpatay. Dili matul-id ang daotang buhat pinaagi sa pagbuhat og laing kadaotan.
2. Ang gamot sa droga ug sa kriminalidad mao ang kakabos sa katawhan, pagkaguba sa pamilya, ug kurapsyon sa katilingban. Unahon pagsulbad ang kawad-on, pinaagi sa permanenteng trabaho ug igong sweldo. Pala
mbuon ang kahiusahan sa pamilya. Tul-iron ang kurakot nga mga pulis ug mga huwes. Giawhag usab namong mga pulitiko nga alagaran ang katawhan di ang ilang kaugalingong interes.
3. Ang way pagpakabana sa kadaotan maisip nga pakig-abin sa kadaotan. Kon pasagdan ang mga nagumon sa droga, mahimo tang kabahin sa problema. Kon gipasagdan ang pagpamatay sa gidudahang mga durugista, naapil ta sa mga angayng manubag sa pagpatay nila.
***
Kita sa Simbahan padayon nga mosupak sa kadaotan samtang gihinulsolan nato ang atong kakuwangan. Buhaton nato kini bisan lutuson kita.
Tabangan sa Simbahan ang mga programa pagtabang sa mga kabos, sama sa panginabuhian, edukasyon ug maayong panglawas.
- Latest
