Pasidaan ni Pope Francis
Nipasidaan si Pope Francis sa pagtumaw sa mga lider nga nagpatuo nga mga kampeyon sa katawhan. Nipasalig nga kon silay makatungtong sa katungdanan ilang unahon sa pag-atiman ug maoy palabihon sa ilang pamunoan ang mga interes sa mga kabos nga maoy kinabag-an sa katawhan.
Nipuno siya ang mga nagpaila nga representante sa mga labing ubos sa katilingban madanihon kaayo atol sa mga krisis. Nga matod niya maoy nahitabo sa Germany niadtong 1933. Matod niya ang mga Aleman nangita og lider nga makahatag pagbalik sa ilang nasudnong kadungganan. Maong nahitumpawak silang Adolf Hitler.
***
Niang kinatibuk-ang pamahayag sa Santo Papa mahitungod sa "populism" atol sa kapin sa oras nga pakighinabi sa pamantalaan sa Espanya nga "El Pais:"
Pangutana: Sa Uropa ug Amerika, nagkalapad ang mga epekto sa krisis, ang nagtubo nga kang-a sa mga kabos ug adunahan, ang kakuwang sa lig-ong liderato nakapatumaw sa mga grupo nga nibarug alang sa kahingawa sa katawhan. Pipila nila nipahimus sa kahadlok sa ka way seguro sa ugma. Nabalaka ka ba ning maong kalamboan?
***
Tubag: Mao nang gitawag nila og populism. Ang mga krisis makapatumaw sa kahadlok. Labing klarong pananglitan mao ang Germany sa 1933. Human ni Paul von Hindenburg, human sa krisis sa 1933, ang Germany naggusbat, kinahanglan siyang mobangon, pagpangita og bag-ong lider, nga takos nga mohiusa sa nasud, ug usa ka batan-ong lalaki nga ginganlan og Adolf Hitler nga niingon, "Makahimo ko."
Ug tanang Aleman nibotar ni Hitler. Si Hitler wa mangawat og gahom, ang iyang katawhan nibotar niya, ug dayon giguba niya ang katawhan. Mao nay risgo.
***
Sa panahon sa krisis, di ta katarung og hukom. Mangita ta og manluluwas nga makahiusa pagbalik sa nasud ug makapanalipod sa nasud gikan sa tanang hulga. Seryuso kaayo nang butanga. Mao nga kanunay gyod kong motambag: Pakigsulti sa usag-usa.
Apan sa kaso sa Germany sa 1933, usa ka madanihong lider nitumaw ug nisaad sa paghiusa sa nasud apan nihatag nila og sayop nga hulagway ug kasayuran, ug nahibawo tang tanan unsay nahitabo. Tungod sa kakuwang sa panagsulti. Way nasud nga may katungod sa paghikaw sa iyang katawhan sa kahigayonan sa pakigsulti uban sa ilang mga silingan.
- Latest
