Pangespiya sa piniliay
Human pasanginli nga responsable sa mga kudeta sa mga gobyerno ug pagpamatay sa mga indibiduwal nga ilang kaatbang ug pagtuboy sa ilang mga alyado sa nagkalainlaing kanasuran sa kalibotan, karon ang Central Intelligence Agency sa Estados Unidos na say nitiyabaw nga nabiktima sa pagpangespiya sa usa sa labing hingpit nga karibal nga nasud, ang Russia.
Matod sa CIA ang Russia maoy responsable sa sunudsunod nga pag-hack sa pribadong servers ug emails sa mga Democrats sa niaging piniliayng presidensiyal aron pagsabotahe sa kandidatura ni kanhi Secretary of State Hillary Clinton ug sa pagseguro sa kadaogan sa opisyal nga kandidato sa Republicans nga si President-elect Donald Trump.
***
Ang pangangkon sa CIA nidason sa nisibaw nga mga pasangil nilang Clinton ug sa Democrats nga ang kampo ni Trump nakigkonsabo sa Russia aron sa pagmaniobra sa resulta sa piniliay ginamit ang electronic espionage. Naduhig sa pasangil ang Wikileaks, ang internet whistleblower, nga maoy nibisto sa pribadong mga komunikasyon sa kampo ni Clinton nga:
Nag-detalye giunsa pagmaniobra ang primaries aron mabaraw ang nisulbong nga popularidad ni Bernie Sanders, ang karibal ni Clinton sa nomination sa Democrats;
Naglatid sa mga paagi unsaon paglibog sa mga botante sa tinuorayng baruganan ni Trump sa labing kontrobersiyal nga mga isyu; ug
Emails ni Clinton nga niggamit sa iyang pribadong server inay sa opisyal nga server sa State Department.
***
Ang pasangil sa CIA mao say labing seryuso nga timaan sa masulub-on nga kahimtang sa relasyon karon sa Russia ug Estados Unidos. Matod sa CIA padayon pa nilang gisusi kon wa ba sab hilabti sa Russia ang nangagi pang Amerikanhong mga piniliay.
Apan gitino sa CIA nga nanghilabot sab ang Russia sa mga piniliay sa mga nasud sa Uropa ug ubang bahin sa kalibotan. Nidason ni sa nahauna nga kahibung sa mga opisyal sa Germany nga nakabantay sila og nag-usbaw nga mga timaan sa langyaw nga pangespiya samtang nagkaduol ang ilang piniliay sunod tuig.
***
Ang resulta sa hingpit nga pagsubli sa pagpangespiya sa Russia batok sa Estados Unidos madawat ni Presidente Barack Obama sa di pa mapupos ang iyang termino sa sunod buwan. Wa nay laing mahimo silang Obama ug ang CIA gawas sa pagtunol sa kasayuran ngadto ni Trump.
Kinsa nihingan na sa bag-ong liderato sa CIA ug nitataw nga di dasonan ang lagda ni Obama kansang panagsungi uban ni Russian President Vladimir Putin iyang gihulagway nga sayop ug wa kinahanglana. Tungod sa pakisusi sa mga sakop sa media, nasakpan ang usa sa mga tagduma sa kampanya ni Trump nga may interes sa negosyo sa Russia. Pag-ulbo sa eskandalo, gipalagpot dayon siyang Trump. Apan wa isalikway ang tambag pakigsuod ni Putin.
- Latest
