Kalisod pagpangita og taxi
Haskang lisora na gyod sa pagpangita og taxi. Nadugangan ang pait nakong kasinatian sa pagkatanggong sa kadalanan nga way masakyan niadtong Biyernes sa hapon. Human sa daklit nakong tuyo sa downtown area sa Dakbayan sa Sugbo, kinahanglan kong mobalik dayon sa among bukid sa Jagobiao sa Dakbayan sa Mandaue aron di mauwahi sa akong trabaho.
Apan nabawo ko sa nisunod nga tunga sa oras. Nihit ang mga taxi nga nangagi ug pulos pa gyod may pasahero. Nakahunahuna ko og suway sa Uber ug Grab apan akong nahibaw-an nga pipila na lay nanagan kay nahadlok sa agresibong kampanya sa LTFRB. Gawas pa, way internet ang akong telepono.
***
Maong napugos ko og panawag sa karaang mga numero sa mga kompaniya sa taxi nga akong nasuwayan sa nangaging katuigan. Ang una nakong natawgan way nitubag. Ang ikaduha niingon nga nanera na sila. Ang ikatulo, nga usa sa labing dako sa Sugbo, morag nakugang sa akong tuyo ug giingnan kong maghuwat.
Human sa pila ka gutlo, nangayo siya og pasaylo nga nataud-taoran sa pagpangita sa ilang radyo kay dugay nang way pasahero nga nanawag sa ilang landline, kasagaran nigamit na sa ilang online app. Pagkataudtaod, gipahibawo ko nila nga ang ilang units nga duol sa Colon nga nanubag sa radyo pulos dunay mga pasahero.
***
Nisuway ko og sugat sa trapiko sa Colon paingon sa eskina Legaspi. Nakadungan nakong ubang mga pasahero nga pulos sab nangita og taxi. Pag-abot nako sa Legaspi may bakante unta apan naunhan ko sa mas abtik nga magtiayon.
Alas-4 na kong niabot sa eskina Manalili, nagsugod na og kabalaka. Nakahunahuna kong mosakay na lang og PUJ og monaog sa malls nga daghang nagpaabot nga taxi uban ang panghinaot nga di kaayo taas ang linya sa nagdali sang mga pasahero. Labihang lipaya nako dihang gikamay ko og taxi driver nga nilapas na sa akong gibarugan kansang pasahero mao pay pagkanaog.
***
Gipasabot ko sa drayber nga ang tinuod nga hinungdan sa kalisod pagpangita og taxi mao ang kahuot sa trapiko. Matod niya nga bisan mas daghan nang pasahero kay nagsugod nang mga kompaniya pagpanghatag og bonus wa mosaka ang ilang kita kay natanggong sila sa kadalanan.
Samtang nag-aginod mi paingon sa Mandaue, nakasabot na ko nga bisan sa pagsubli-subli sa LTFRB nga kolorum ang Uber ug GrabCar may mga pasahero gihapon nga moinsistir pagkuha sa ilang serbisyo. Mas sayon ug luwas ang pagpaabot og kasakyan sud sa mga buhatan ug mga pinuy-anan kay sa magduas sa kadalanan. Salamat sa akong katihik, uwahi na kong nakamatngon nga mahimo ra man gyod diay untang i-activate ang akong mobile internet ug magpaabot og sakyanan samtang nangape inay nagbahas-bahas sa downtown.
- Latest
