Ayaw ko’g tontoha, uy!

Inig lakaw ni Luis paingon sa iyang trabahoan bation dayon ni Ines ang tumang kalipay kay makalugar na man pud siya sa iyang pagabuhaton nga mao ang paghuwat kang Sidro, ulitawong bagis, ug dinhi sa ilang dapit way mosukol niini kay mahadlok nga gawas nga mamusil, mangulata pud.

Ug karon human maligo, nagpahumot dayon si Ines ug iyang gisul-ob ang nipis kaayong sinina nga sihag. Mao kini ang sitwasyon, iya lang gitonto si Luis kay alang kaniya wala man sila’y ugma nga matawag nga halandumon kay dili sila kasado.

Ug wala dangtig dugay miabot si Sidro. Gigakos dayon siya ni Sidro ug giromansa pag-ayo. Miutnga si Ines. Ug namulong, “Sid, adto ta sa kuwarto, ayaw dinhi...”

Tuod, nanulod sila ug dito ilang gitagbaw ang usag-usa. Unya, iyang gipakaon si Sidro sa linat-ang manok nga iyang giluto kaganihang kaadlawon ug gihatagan pa gyud og kuwarta Nahigugma man gud siya kang Sidro kay gawas nga guwapo kini, macho kaayo’g lawas  ug nindot modala’g romansa kay kang Luis. Pagka sunod adlaw wala motrabaho si Luis, naglingkod siya sa usa ka silya atbang sa larawan sa iyang asawa nga gipatong sa may lamisita. Namulong siya dihang milingkod si Ines sa atbang.

“Ines, mahimo ka nang makabiya dinhi. Imo man lang gud kong gitonto nga unta nahigugma man ko nimo. Wala ko mag-isip kun unsay imong kagahapon, ang importante nga magtukod ko’g usa ka pamilya kay pakyas ko sa una kong asawa kay nasakit siya ug wala kami anak.

Dako na unta ang natigum nako sa banko alang sa akong giplanong pagpakasal nimo, apan anugon. Duna koy tigpaniid nga akong gisuholan matag anhi ni Sidro dinhi sa akong balay. Sa ako pa gyong balay ninyo buhata ang usa ka buhat nga lawasnon.

Ug karon, hiposa na ang imong mga sinina ug biya dinhi. Ngano man diay’g magpabilin kong biyudo hangtud sa  hangtod?” Ug giinom ni Luis ang gitimpla niyang kape ug isog nga mitutok kang Ines. (Katapusan)