Vargas ‘di ka-level ni Pacquiao--Peñalosa

LOS ANGELES – Tinimbang ng pinakamahusay na Filipino technical boxer ang tsansa ni Jessie Vargas na talunin si Manny Pacquiao sa kanilang bakbakan sa Linggo sa Las Vegas.

Naniniwala si dating two-division world champion Gerry Peñalosa na walang kakayahan si Vargas na gulatin si Pacquiao dahil ang WBO welterweight champion ay wala sa kalingkingan ng Filipino superstar.

“Average boxer, hindi ka-level ni senator,” sabi ni Peñalosa kay Vargas.

Ibinahagi ni Peñalosa, nagkampeon sa super flyweight at bantamweight divisions, ang kanyang opinyon tungkol sa laban nina Pacquiao at Vargas habang nag-eensayo si ‘Pacman’ sa Wild Card Gym.

Nang tinanong tungkol sa pamatay na overhand right ni Vargas, sinabi ng tubong San Carlos City, Negros Occidental na balewala ito sa bilis ni Pacquiao.

Pinuna din ni Peñalosa ang kabagalan ni Vargas.

“Wala, slow motion eh. Parang nagpapaalam bago sumuntok. Mahirap maka-tama,” paliwanag ni Peñalosa.

 “So swerte na si Vargas kung makalagpas siya ng eight rounds,” dagdag pa nito.

May tsansa si Pacquiao na wakasan ang kanyang seven-year knockout drought sa paghahamon kay Vargas sa November 6 (Manila time) sa Thomas & Mack Center.

Ngunit hindi naman tiniyak ng kanyang kampo ang isang knockout victory.

Pero iba ang paniniwala ni Peñalosa.

“Eto na yung inaabangan natin,” sabi ni Peñalosa sa inaasahan niyang knockout win ni Pacquiao.