Ang lubnganan ni Kristo

Sa labing unang higayon human sa kaliboan ka siglo sa kamatayon ni Hesukristo nga nakita na sa pipila ka tawo ug makita sa tibuok kalibutan ang hitsura sa gipahigdaan kaniya sa iyang lubnganan.

Ang mga restorer nga nitrabaho sa Church of the Holy Sepulcher sa Israel diin nahimutang ang lubnganan ni Kristo nipakita sa hitsura sa bato nga gipahigdaan ni Kristo sa paglubong kaniya human siya namatay. Ang lubnganan ni Kristo nga gihabolan o gitabonan sa mga slab sa marmol sukad niadtong 1,555 AD gikuha sa mga archaeologist. Ilawom sa maong mga marmol ang gihigdaan ni Kristo.

Wala damha sa archeologist-in-residence sa National Geographic Society nga kauban sa restoration project sa ilang nakita nga gidaghanon sa mga filling material ilawom sa mga slab.

Matud ni Frederick Heibert duna sila’y nahimong analysis ug pagtuon sa orihinal nga hitsura sa bato nga gihigdaan ni Kristo. Base sa Kristohanong tradisyon, ang patay nga lawas ni Kristo nga giputos sa puti nga panapton gilubong ngadto sa usa ka kinulit nga bato nga gipalibutan sa mga anapog sulod sa usa ka langob sa anapog.

Human sa tulo ka adlaw sa kamatayon ni Kristo, may pundok sa kababayen-an nga niduaw sa iyang lubong. Apan sa pag-abot nila, ilang nakita nga naabli na ang bato nga gitabon sa ganghaan sa langob ug sa ilang pagsulod, wala na ang patay’ng lawas ni Kristo.

Human nadiskubrehan pag-usab ni Rayna Helena, ang inahan ni Roman emperor Constantine niadtong 336 AD ang lubnganan ni Kristo, ila kining gipatukoran og simbahan alang sa pag-ampo.

Usa ka edicule, kon gamay nga balay sulod sa Church of the Holy Sepulcher, ang gitukod diin gituohan nga gipahigda ang patay nga lawas ni Kristo. Nunot sa paglabay sa liboan ka katuigan, dunay restoration nga gipahigayon sa edicule.

Karon, sa ilang pagkuha sa slabs nga nagtabon sa gihigdaan ni Kristo ilang nakita ang daghang tipaka nga posibleng magtudlo kanila sa hitsura sa bato nga gihigdaan ni Kristo. Ang gihimong restoration ug ang pagkuha sa marmol nga slabs gisaksihan sa  Greek orthodox nga mga pari, mga paring katoliko, Franciscans ug sa mga nagtrabaho sa restoration.

Dunay pipila ka mga pilgrim nga nahatagan sa kahigayonan nga makasulod ug makakita sa hitsura sa lubnganan. Dili masabot ang ilang gibati. Ang uban naghilak, may pipila nga nagdala sa ilang gagmay nga mga anak, nituyo pagbutang kanila sa slabs nga gikuha.  Ang uban nipahimulos sa pagtrapo sa ilang dala nga mga panyo sa slabs. Giila nga usa ka sagrado nga dapit ang Church of the Holy Sepulcher tungod kay kini ang lubnganan ni Kristo.

Ang Church of the Holy Sepulcher adunay unom ka grupo nga nag-atiman. Apan gipangulohan sa tulo ka dagkong grupo: Ang Greek Orthodox Church, Simbahang Katoliko ug ang American Ortjhodox Church.

Magpadayon ang mga pagtuon sa mga tipaka nga ilang nakuha gikan sa lubnganan ni Kristo aron mapakita sa kasamtangang henerasyon ang posibleng hulagway sa gilubngan ni Kristo. Ang National Geographic nga maoy nidokumento sa proseso gikatakdang mopakita niini karong Nobiyembre.