5 PSL tankers hinirang na Most Outstanding Swimmers

TOKYO - Limang Phi­lip­pine Swimming League (PSL) standouts ang gina­waran ng Most Outstan­ding Swimmer awards sa 2016 Buccaneer Invitatio­nal Swimming Championship na ginanap sa St. Ma­ry’s International School swimming pool dito.

Nanguna sa listahan si Micaela Jasmine Mojdeh ng Immaculate Heart of Mary College-Parañaque na sumisid ng anim na gin­to at dalawang pilak tampok ang apat na individual records para makuha ang MOS trophy sa girls’ 9-10 event.

Winasak ni Mojdeh ang rekord sa 200m Individual Medley (2:44.23), 50m butterfly (33.07), 100m butterfly (1:11.95) at 100m IM (1:15.86).

Pinangunahan rin ni Moj­­deh ang girls’ 9-10 200m medley relay (2:40.41) at 200m freestyle relay (2:21.49) sa pagkopo ng gintong medalya kalakip ang mga bagong marka, habang nakapagbulsa rin ito ng pilak sa 100m freestyle at 50m breaststroke.

Magarbo rin ang kampanya ni Marc Bryan Dula ng Weisenheimer Acade­my na umani ng ginto sa 50m butterfly (35.49) at 50m backstroke (37.91), pilak sa 100m backstroke (1:24.19), at tanso sa 100m breaststroke (1:39.37) at 100m butterfly (35.49) para masungkit at pagharian ang boys’ 9-10 event.

Winalis ni Hope Christian School-Legazpi bet Trump Christian Luistro ang la­hat ng kaniyang individual events upang kubrahin ang MOS sa boys’ 8-under.

Humataw siya sa 25m freestyle, 50m breaststroke, 25m butterfly, 50m free­style, 25m backstroke at 100m IM.

Humakot si Rio Lorenzo Malapitan ng Divine Word College of Calapan ng apat na ginto, isang pilak at isang tanso sa boys’ 11-12.

Namayagpag si Malapitan sa 100m breaststroke, 50m butterfly, 50m beaststroke at 100m IM at naka­pilak sa 50m freestyle at tanso sa 200m IM.

Hindi rin nagpahuli si Ky­la Soguilon ng Sun Yat Sen School-Kalibo na may isang ginto at apat na pilak sa individual events at dalawang ginto sa relay - sapat para makuha ang MOS award sa girls 11-12 class.

“It’s a job well done for our young swimmers. We would like to thank all perso­nalities and groups who helped us in this endeavor es­pecially Sen. Nikki Cose­teng, Commodore Dante Ji­menez of the Violence Against Crime and Corruption, Philippine Sports Commission William “Butch” Ramirez, and parents and coaches,” ani PSL president Susan Papa.

Humakot ng kabuuang 25 ginto, 17 pilak at 15 tanso ang PSL tankers kasama ang pitong bagong rekord para sa ikalawang puwesto sa overall team standings.

Kasama rin sa delegas­yon sina Diliman Prepara­tory School standouts Paul Christian King Cusing, Paula Carmela Cusing, Lee Grant Cabral at Albert Sermonia II gayundin sina Felice Alexis Reyes, Julyiana Cassiopea Calibjo, Lucio Cuyong II, Diane Fabicon, Za­chie Gallegos, Jairus Lester Laguidao, Angelo Ma­caraig, Edgar Danzel Ro­berto, Tiffany Shaine San­chez, Remogenes Sobretodo, Kobe Soguilon, Triza Haileyana Tabamo, Lowestein Julian Lazaro, John Rylle Villagomeza at Shyne Nicole Villagomeza.