16 ka sundalo gitaktak tungod sa drugas
CEBU, Philippines - Dili lang ang kapolisan ang nanghinlo sa mga sakop nga adis-adis, hasta ang Armed Forces of the Philippines aduna say programang susama niini ug 16 na nila ka mga sakop nga nagpositibo sa drugas atol sa random drug testing ang gitangtang na sa serbisyo
Kini ang gibutyag ni Major Lino Araya Jr., sa Central Command atol sa gipahigayon nga AFP-PNP Press Corps Fun Shoot 2016 program niadtong Sabado.
Matud pa ni Araya ang pagtaktak niining mga sundalong drug users kabahin sa ilang internal cleansing. Sumala pa ni Araya sila nagpositibo sa random drug test ug ingon man sa confirmatory test. Dili parehas sa ubang ahensiya sa gobiyerno, mas paspas ang desisyon pagtangtang sa mga sundalong magpabadlong.
Ang AFP kaabag karon sa kapolisan ug ubang law enforcement agencies sa gubat batok ilegal nga drugas sa nasud.
Gisugdan na usab nila ang mga tahas nga nakalatid sa AFP-PNP Joint Letter of Instruction ug suportado nila ang pagbutang og mga drug rehabilitation centers sa sulod sa ilang mga kampo ug lakip sa pag-apil sa civil military operations ug pagtabang og organisar sa katilingban batok sa ilegal nga drugas. (BANAT NEWS)
- Latest