Teroristang ASG nia Sugbo?

CEBU, Philippines - Ang Police Regional Office-7 nihimo og pakisusi sa impormasyon nga adunay upat ngadto sa unom ka mga sakop sa teroristang Abu Sayyaf nga ania sa Sugbo niadtong adlaw nga Biyernes.

Ang hepe sa Regional Intelligence Division (RID)-7, Supt. Julian Entoma nagkanayon nga ang ilang buhatan kauban sa uban nga ahensiya nakadawat og impormasyon nga niadtong adlaw nga Biyernes naabot dinhi ang mga sakop sa gidudahang ASG. Base sa nahipos nga impormasyon sa RID-7 gikan sa mga intelligence groups sa Mindanao didto gikan sa Dumaguete ang grupo ug paingon sa Sugbo ug giingong gipangulohan kini sa usa ka Kumander Messiah.

Tungod niini, nilusad dayon sila og operasyon kauban ang ubang law enforcement units sa pagpangita sa maong grupo.

Apan niadtong adlaw nga Domingo nakadawat na sab sila og impormasyon gikan sa PRO-9 nga ang maong grupo nasigpatan pagbalik didto sa Mindanao.

Apan bisan pa niini wala mokompiyansa ang mga polis kay wala pa sila nakahibalo kung ang tanang sakop sa grupo nakabiya na sa Sugbo.

Nagtuo si Entoma nga lagmit ang hinungdan nga ania sa Sugbo ang maong grupo kay nangita kini og promeninteng personalidad o langyaw nga makidnap para makasapi sa pangayuon nga ransom.

Gipanawagan ni Entoma ang mga tawo sa Central Visayas ilabina ang Muslim Community sa rehiyon nga mo-report sa mga polis kung sila makabantay sa mga kadudahan ug mga bag-ong nawong sa ilang dapit. Ang Muslim Community sa Dakbayan sa Lapu-Lapu, Mandaue, Talisay ug Dakbayan sa Sugbo ang gikatahong walay nadawat nga impormasyon bahin sa maong grupo.

Gialerto na usab nila ang mga chiefs of security sa mga malls, lodging houses ug uban pang establisamento nga magbantay ug di mokompiyansa.

“Ang Cebu City gyud among gipalihok og maayo. We utilized our personnel sa region to assist the Cebu City,” matud pa ni Entoma.

Si Luzmindo Mamaug Jr., ang tigpamaba sa Central Command nibutyag nga nakadawat usab sila og pahimangno  bahin sa maong grupo ug nilusad dayon sila og mga operasyon pagpangita kanila.

Samtang si Konsehal Dave Tumulak, Deputy Mayor for Police Matters ug Chairman sa Committee on Public Order and Safety sa siyudad miawhag sa katawhan nga kinahanglang magtinabangay alang sa seguridad sa tanan.

Si Cebu City Mayor Tomas Osmeña sa iyang bahin nagkanayon nga gawas sa pag-monitor sa palibot iyang gidasig ang mga tawo nga motabang pagpaniid sa ilang palibot ug mo-report dayon sa kapolisan kun may mga kadudahang tawo diha sa ilang lugar.

Ang mayor nangayo na og tabang sa Muslim Community sa Sugbo aron pagsiguro sa seguridad sa siyudad, matud pa sa mayor makaalarma kini kaayo nga balita. (BANAT NEWS)