Tommy nangayo og lugway sa landfill
CEBU, Philippines - Hangtud tapos niining tuiga ang gipangayo ni Cebu City Mayor Tomas Osmeña sa korte nga lugway nga makapangita ang kagamhanan sa siyudad og laing landfill.
Kini atol sa husay sa Court of Appeals sa petisyon nga gisang-at ni Konsehal Joel Garganera labot sa pagpasira sa Inayawan landfill.
Matud ni Osmeña nga mangita pa sila og budget ingon man lugar diin makaminus ang siyudad sa bayranan sa paglabay sa basura.
Ang Department of Environment and Natural Resources-Environmental Management Bureau-7 ug Department of Health-7 ang nakahukom na nga ihunong ang paglabay og basura sa Inayawan. Mismo si DENR Secretary Gina Lopez ang nimando na sa pagpasira sa landfill bisan pending pa ang petisyon ni Garganera sa CA.
Wala pa nahukmi sa korte kung kanus-a gyud moepekto ang pagpahunong sa operasyon sa landfill.
“That's a good question. I have to collect the garbage, we have no choice,” matud ni Osmeña dihang gipangutana sa mga tigbalita kung unsay buhaton kung walay budget nga makit-an ang siyudad.
Magtagbo ang DENR-EMB-7, DOH-7, Osmeña ug Garganera kabahin sa maong isyu.
Ang CA nihatag og 15 ka adlaw kang Osmeña ug Garganera nga moduso sa ilang position papers.
Human niini, ang CA mopagawas na sa ilang desisyon labot sa petisyon.
Si Garganera nisang-at og kaso human gipaablihan og balik ni Osmeña ang Inayawan landfill. (BANAT NEWS)
- Latest
