EDITORIAL - Sugal ni Duterte

Giduwaan og maayo ni Presidente Duterte ang mga kritiko ug bisan ang iyang mga kaalyado pinaagi sa makalibog niya nga mga pamahayag nga daghan og kahulogan alang sa uban.

Gipalaway niya og maayo ang mga naglagot sa US sa iyang pamahayag nga putlon na ang kooperasyon sa Pilipinas ug US kabahin sa ekonomiya ug militar.

Bisan wa niya giklaro, apan nagpasabot gyud kadto nga tanang negosyo nga iya sa mga Amerikano, iyang papahawaon na dinhi ug putlon na ang kapin 60 ka tuig nga Mutual Defense Treaty ug ang Enhance Defense Cooperation Agreement (EDCA) tali sa duha ka nasud. Gusto sa US nga klaruhon kun unsay buot gipasabot ni Duterte.

Apan nagmaya ang China pagkadungog niini ug karon bilyones dolyares nga trade agreements ang napirmahan tali sa duha ka nasud.

Ang mga opisyal usab sa Russia mipadayag dayon og kaandam sa pagtabang sa Pilipinas sa mga gikinahanglan niini gikan sa ilang nasud.

Apan pagbalik ni Duterte sa Pilipinas, iyang giklaro nga ang iyang pamahayag wala nagpasabot nga putlon na niya sa hingpit ang relasyon sa Pilipinas ug sa US.

Basin nasipyat lang siya sa iyang gipang-estorya didto o ba kaha may nitambag nga klaruhon kini kay mura’g economic/security suicide kini sa Pilipinas kun iya gyud kining buhaton. Apan mahimong isipon nga pamaagi niya kini aron putlon na ang inpluwensya ug naghinubrang pagsalig sa mga Filipino ngadto sa US. Senyales kini aron ang ubang mga nasud sa pikas paril, sama sa China, Russia ug ang ubang mga nasud sa Eastern Bloc, magka-interes magnegosyo dinhi ug mga Filipino gihapon ang makabenepisyo.

Kaniadto pa adto gyud pusta ang Pilipinas sa Amerika mao nga ang ubang mga nasud nga dunay kalagot sa US dili ganahang magnegosyo dinhi.

Sa gibuhat ni Duterte, ingon sa giilogan ang Pilipinas nga ilang makaalyado o anugon kun mawagtang kini sa ilang grupo. Maisip si Duterte nga usa ka banggiitang sugarol, wala gyud mopalili sa iyang baraha. Unta sa dili pa mabisto ang iyang baraha, makakabig na og daghang benepisyo ang mga Filipino.