Paghawan sa daplin sa sapa giawhag

CEBU, Philippines - Giawhag ni Konsehal Jerry Guardo ang administrasyon ni Cebu City Mayor Tomas Osmeña nga dalion pagpabalhin ang mga pamilya nga anaa nagpuyo daplin sa kasapaan aron magamit na ang P700 milyones nga gitagana sa nasudnong kagamhanan pag-rehabilitate sa kasapaan.

Si Guardo nga maoy chairman sa Committee on Infrastructure sa Cebu City Council mibutyag nga nabalaka siya nga kun dili dayon magamit ang gigahin nga pundo sa national government, mahimong mausik lang ang maong kuwarta kay mabalik man kini sa nasudnong panudlanan.

Matud ni Guardo nga ang P700 milyones gigahin kini aron nga gamiton sa pagpalawom sa kasapaan nga mabaw na kaayo ug ingon man ang pagpalapad pagbalik sa mga sapa nga giabusohan pag-ayo sa mga mapahimuslanon.

Apan nasubo si Guardo tungod sa baruganan sa administrasyon ni Osmeña nga mipasuspenso sa pagpang-demolish sa kabalayan diha sa tampi sa kasapaan.

Si Guardo miingon nga dili supak sa balaod nga balhinon ang maong mga pamilya gikan sa tampi sa mga sapa basta hatagan lang sila og laing dapit nga ilang kabalhinan.

Samtang gisaway ni Guardo ang mga engineers sa dakbayan sa Sugbo nga iyang gihulagway nga hinay kaayong mohimo og Program of Works and Estimates (POWE) alang sa mga drainage projects.

Kini maoy rason nga ang pagtrabaho sa mga agianan sa tubig wala dayon malihok ug kun adunay pagbunok sa ulan dali ra kaayo nga makamugna og lunop sa daghang dapit sa dakbayan sa Sugbo.

Si Engr. Josefa Ylanan nga maoy pangulo sa Department of Engineering and Public Works (DEPW) wala kaayo mohatag og reaksyon sa pamahayag ni Guardo.

Matud ni Ylanan nga aduna silay mga “priority” nga giuna nila sa pagtrabaho. (BANAT NEWS)