Tulo ka “bugaw” gikombikto

CEBU, Philippines - Tulo sa upat ka suspek sa human trafficking nakoombikto sa Cebu City Regional Trial Court -Branch 24 ug gimandoan pagbayad og tag P2 milyones kada usa ngadto sa mga biktima.

Si Manuel Peñafort, Agripina Diana, ug Jemel Geonzon, gikonbikto sa kasong RA 9208 o Qualified Trafficking in Persons Act  human mopagawas og desisyon si Judge Jose Nathaniel Andal sa maong korte.

Samtang ang ikaupat nga suspek nga si Jhoanna Fontanilla, gi-acquit sa korte tungod kay walay lig-on nga ebidensya batok kaniya.

Ang mga suspetsado, gikatahong mang-recruit og mga babaye sa Cebu City aron dad-on sa Bohol aron motrabaho sa Alping's KTV Bar nga gipanag-iya nilang Peñafort ug Diana, apan nadakpan sila niadtong 2011 sa PNP Regional Anti-Human Trafficking Task Force nga gipangulohan ni Senior Inspector Maria Theresa Macatangay inubanan sa  Department of Social Welfare Development ug International Justice Mission.

Ang mga biktima gikatahong gipapuyo og cottage duol sa maong bar bugti sa libreng pagpuyo ug pagkaon ug libreng plete padulong sa maong dapit apan gibugaw sila ngadto sa mga kostumer P1,500 kada usa aron makig-sex.

Gawas sa P2 milyones, pabayron usab sila og tag P500 mil nga moral damages ug P100 mil nga exemplary damage ngadto sa mga biktima niini. Ang mga na-rescue nga mga bata gipaubos na sa kostudiya sa DSWD. (BANAT NEWS)