1 patay, 9 sikop

CEBU, Philippines - Patay ang giingong drug pusher nga gidudahang sakop sa grupo sa gipasanginlang napatay nga drug lord sa Dakbayan sa Sugbo human kini nakigpinusilay sa kapolisan atol sa buy-bust operation diha sa Brgy. San Miguel sa Lungsod sa Cordova.

Ang namatay giila ni Police Officer 2 Vilma Degamo nga mao si Jeffrey Daan,38, kinsa giingong sakop sa grupo ni Jeffrey “Jaguar” Diaz kinsa napatay na sa kapolisan.

Matud pa ni PO2 Degamo nga ang mga barangay opisyal  sa maong dapit mireklamo diha sa ilang buhatan kabahin sa padayong paghitak sa ilegal nga drugas diha sa ilang dapit.

Dihang nahidangat ang team sa kapolisan nga gipangulohan ni Senior Inspector Jomar Madel  gipalitan ang maong suspetsado og shabu sa kantidad nga P2,000.

Sa pagtunol sa suspetsado sa duha ka putos nga shabu daw nakamatikod kini nga polis ang iyang kustomer hinungdan nga midagan kini ug misakay sa iyang sakyanan ug mipabulhot pagpadagan paingon ngadto sa barangay Gabi.

Hinungdan nga gigukod kini sa kapolisan apan dihang naapiki gikatahong miibot kini sa giluklok nga armas nga kalibre .45 ug gipusil ang mga polis. Matud pa ni PO2 Degamo nga dali nga nakapasalipod ang polis ug way naigo kanila ug sa pagsinukliay sa bala namatay si Daan.

Gidala pa kini ngadto sa Lapu-Lapu City District Hospita. apan gideklarar kini sa mga doktor nga dead on arrival.

Nakuha diha sa crime scene ang duha ka kalibre .45 nga armas uban sa mga bala, mga medium size packs ug 51 ka gagmay nga pakete nga pulos may sud nga gidudahang shabu nga lapas P300 mil ang kantidad, mga drug paraphernalia, Toyota Rav 4 nga sakyanan niini ug  salapi nga buy-bust  money nga P2,000 .

Samtang nakaikyas gikan sa kapolisan ang usa ka drug personality nga sikupon unta sa kapolisan sa Talisay City diha sa Sitio Magay, Brgy. Tanke. Nadakpan hinuon ang bata-bata niini nga nahabilin.

Sila si Supt. Aileen Recla, pangu sa kapulisan sa dakbayan miila sa  suspek nga si Josel Cabangca alyas Dadin kinsa nikisikisi ug nilugnot hangtud nga nabuhian sa mga polis ug nakaikyas agi sa bintana.

Sa dihang naglinayugay pa ang suspek ug ang kapulisan natagak ang tulo ka medium nga pakite sa shabu nga gikan ni Cabangca.

Nasikop hinuon ang iyang kauban nga si Johnreno Obrero, 20  nga giingong iyang batabata.

Sa laing bahin, duha ka tawo ang nadakpan sa buy-bust operation sa Purok 6, Brgy. Pulpogan, sa Lungsod sa Consolacion.

Apan nakaikyas ang target sa mga polis nga si Rudy Coyoca Capangpangan, 47, nga giingong namaligya og drugas sa lugar.

Ang nadakpan mao sila si Jocelyn Bontilao Alivio, 47, ug Christopher Alivio, 24, pulos nagpuyo sa maong dapit. Nakuha gikan sa duha ang unom ka paketeng gidudahang shabu ug ang buy-bust money. Apan nakadagan sa luyong bahin sa balay ang ilang target nga misuot sa ngitngit nga bahin sa lugar.

Samtang sa Cebu City unom ka tawo usab ang nasikop sa managlahing operasyon sa kapolisan diha sa Brgy. Mambaling, Suba, T. Padilla , Guadalupe ug Tejero. Romeo T. Limpangog, Gabriel Bonjoc ug Clydyl Avila (BANAT NEWS)