Kalibog ni Duterte
Kalibog sa langyawng mga negosyante ang gibasol sa paspas nga pagtibugsok sa peso atubangan sa Amerikanhong dolyar ug mga kuwarta sa ubang kanasuran. May sukaranan ang kalibog kon kampanya sa drugas ang hisgutan:
•Sa iyang inugurasyon, nipasalig si Presidente Rodrigo Duterte pagtahud sa balaod sa iyang kampanya batok sa ilegal nga drugas ug kriminalidad; apan
•Dihang nakalingkod na, gidasig ang kapolisan ug militar pagpatay sa mga durugista, gipasidan-ang patyon ang gidudahang drug lord nga si Peter Lim kon mokawas sa ayroplano sa Ninoy Aquino International Airport (NAIA) ug niluwat og shoot-to-kill order batok ni Albuera, Leyte Mayor Rolando Espinosa Sr. ug iyang anak nga si Rolando “Kerwin” Espinosa Jr.; apan
•Dihang gibuyag nang extrajudicial killings, nanghunaw nga way labot ang iyang pamunoan sa EJKs, dihang nakigkita niya si Lim igo lang giawhag si Lim pagtabang sa National Bureau of Investigation pag-absuwelto niya, ug dihang nipiyait si Mayor Espinosa batok sa iyang anak, gikustodiya siya sa kapolisan.
***
Utrong kalibogan ang pakig-away ni Duterte sa United Nations:
•Nihulga siya pagpahawa gikan sa UN ug pagtukod og bag-ong kahugpongan uban sa People’s Republic of China ug kanasuran sa Africa; apan
•Human nahiagom og sibaw nga pagsaway, nipasabot nga nagkomedya ra siya;
•Dihang gitawag ang iyang atensiyon sa UN sa nagpadayong EJKs, gibalikas na sang kadagkoan sa UN ug gisukmatan nganong way nahimo sa mas lapad nga pagpangyatak sa tawhanong katungod sa Syria ug ubang bahin sa kalibotan ug sa ubang yugto sa kasaysayan; ug
•Human niawhag sa UN sa di pagyatak sa sobereniya sa Pilipinas, nitanyag si Duterte nga pasudlon ang mga imbestigador sa UN apan siyay magbuot asa sila mangimbestigar ug kinsay ilang pakighinabian ug hatagan siya og kahigayonan pagsumbalik og pangutana sa kadagkoan sa UN ug kon mahimo paapilon ang mga pangu sa Estados Unidos ug sa European Union.
***
Kalibogan sang postura ni Duterte sa relasyon sa Estados Unidos:
•Gibalikas niya si US President Barack Obama ug gisaway nga taphaw ang mga hinabang nga nadawat sa niaging mga pamunoan sama sa mga ayroplanong igugubat nga way bomba;
•Gipalayas niya ang Amerikanhong mga sundawo gikan sa Mindanao aron nga motunhay ang sabutsabot sa kalinaw uban sa mga rebeldeng Muslim apan ganahan siyang magpabilin sila sa ubang bahin sa Pilipinas aron nga makatabang sa pagpanalipod sa mga interes sa nasud kon mograbe ang panagsungi uban sa China mahitungod sa Spratlys; ug
•Dihang gibuyag sa Standard & Poor’s Financial Services (S&P), usa ka Amerikanhong kompaniya, sa EJKs kay posibleng makabira sa credit rating sa Pilipinas, nideklarar nga mahimong manglayas ang Amerikanhong mga negosyante kay mahimo siyang modangop sa Russia ug China nga iyang gihulagway nga nagpaabot ra niya.
- Latest
