Unsay nakalahi sa Allo
Kay nagkatapok man mi gahapon sa buntag, gisuwayan namo ang labing bag-ong chat app, ang Google Allo: Gi-download namo ang app nga mao pa gyoy pag-abot sa Google Play ug App Store alang sa Pilipinas; among gitaod ginamit ang among mga numero sa telepono ug Google accounts, naghimo mi og group chat ug nagpadad-anay dayon og mga mensahe.
Wa siyay kalainan sa nag-una nga chat apps sama sa Viber, Messenger ug WhatsApp sa Facebook, Hangouts sa Google, Kakao Talk, Line ug uban pa: Makapada og text, letrato, video ug audio messages, ingon man abunda nga emojis. Maong among gisusi unsay nakalahi sa Allo aron may sukaranan ming mosuway paggamit.
***
Gisuwayan namo og sungog ang among kauban (kay nauwahi man siya og abot) nga ganahan kaayong mobutang sa iyang mga letrato ug mga libro online. Wa siyay Facebook busa hapit tanan sa iyang letrato ug trabaho masipong sa gamhanang Google search.
Tuod man, nakita dayon sa tanang sakop sa bag-o namong grupo di lang ang iyang mga hulagway ug mga libro kon dili hasta ang iyang musical notes (kay lain niyang raket mao ang pagtagik og mga tuno sa kanta, bahala na kon siyam-siyaman una mahimoan og lyrics). Nahimo ni sud mismo sa app pinaagi sa pagpada sa mensahe nga “@google thads bentulan photos.”
***
Dihang gipanggutom na, nagpada mi og mensahe nga “@google restaurants.” Human sa pila lang ka pamilok, nigawas ang listahan sa pito ka kinadul-an nga kan-anan nga may pakapin nga mapa, numero sa telepono ug menu.
Gituslok dayon ang icon sa telepono sa kan-anan nga among napilian, nag-order mi sa gikasabotan nga mga putahe (giseguro og apil ang haluhalo), gisusi unsang orasa makuha ug giablihan ang mapa (sud gihapon sa app) aron matultolan ang labing laktod nga ruta. Wa ray 15 ka gutlo, naabot namo ang kan-anan, nakuha ang among order, nahibalik sa among bay ug nakabuylo dayon ang paniudto.
***
Laing bentaha nga among nakit-an sa Allo: Kon makadawat ka og mensahe, may inandam nang mga tubag nga mahimong pilian ug mapada dayon sa way pagtuslok og bisan usa lang ka letra sa gamitoy nimong keyboard (nga mapuslanon kon nagdali o may laing gihimo). Kon makadawat og letrato, may inandam nang tukma nga mga reaksiyon, nga sa pipila ka higayon maglakip sa tukma nga paghingan sa labing talagsaon nga mga hulagway, ug busa mahimo rang pilian ug ibawos dayon sa pagpada.
Mobalhin na ba mi sa Allo? Tingali. Pero wa pa papasa ang karaan namong grupo sa Viber. Mahimong magbalhin-balhin una mi og gamit sa mosunod nga mga adlaw. Hangtod nga makapili mi unsay labing sayon ug labing matinabangon nga chat app.
- Latest
