Online nga isnab sa pasahero

Usa ko sa labing unang nisuway sa online applications pagpangita og mga sakyanan nga makahatod nako sa mga destinasyon sa labing daling panahon. Apan usa sab ko sa labing unang nibiya sa online apps dihang namatikdan nga mas dali kong makasakay ug makaabot sa akong padulngan kun magpara og taxi o PUJ sa kadalanan.

Usa sa akong gibiyaan maong online app kansang agresibong promo nga nakadani sa daghang pasahero mao ra say nakadaot nila. Ilang mga drayber nga nag-apas sa mga insentibo pinasikad sa gidaghanon sa mga pasahero matag adlaw mopili sa mga ruta nga dali ra silang kabalik ug molikay sa mga pasahero nga lagyo ug mingaw ang mga ruta.

* * *

Kun mopara ka og bakanteng taxi sa dan apan inay hunongan labyan lang sa drayber, mahimong ilista ang license plate number, i-report ang kalapasan sa Land Transportation Office (LTO) o Land Transportation Franchising and Regulatory Board (LTFRB) ug tambongan ang husay aron nga mamultahan ug masuspenso ang drayber ug operator.

Apan kun himuon ang samang kalapasan online, sama sa gihimo sa taxi drivers sa online companies nga moisnab sa mga pasahero nga may mga destinasyon nga di madanihon – kay nagkamang ang trapiko o nahimutang sa ngilit sa Metro Cebu ug busa maglisod pagpangita og pasahero sa pagbalik – way kalibotan sa kalapasan ang pasahero ug inutil sa pagbadlong ang gobiyerno.

* * *

Laing buslot sa online apps mao ang paghatag og kahigayonan sa mga pasahero pagsaad sa drayber og patong sa naandan nga plitehan. Nga maoy gidangpan sa mga pasahero kun layo ug nihit og mga sakyanan ang ilang gigikanan, o kun magbunok ang kusog nga uwan, o kun magdali paingon sa ilang destinasyon.

May motanyang og P20, o P50, o kun nag-apura gyud P100 o mas dako pa. May mga drayber sang mag-atang kinsay makasaad og mas dakong patong. Ang mga pasaherong way ikapuno mapan-os og paabot. Sa laktod, ang online apps nahimong kahimanan sa makauuwaw’ng suburnohay.

* * *

Nisaad ang LTFRB, nga maoy naghatag og pagtugot sa online apps, sa pagsusi sa mga binuang nga nahisgutan sa ibabaw. Apan nangligid nang pila ka buwan, nga naabtan na lang sa pagbanos sa bag-ong pamunoan, way nahitabo.

Nipasalig sang online companies pagsubli sa ilang sistema aron nga di kaabusohan ang ilang teknolohiya. Apan hangtod karon nagpadayon ang mga binuang.

Nanghinaot ko nga human saboni ni Presidente Rodrigo Duterte tungod sa wa gihapon mabadlong nga pangurakot sa ilang nasudnon ug rehiyonal nga mga buhatan, ang bag-ong mga liderato sa LTO ug LTFRB molusad og mas determinadong paningkamot pagpanalipod sa mga katungod sa mga pasahero gikan sa pangabuso sa mga drayber ug operators. Sa kadalanan. Ug online.