Traffic enforcement

Angay na gyud karon nga estriktohon ang pagpatuman sa mga lagda sa trapiko, dili lang dinhi sa dakbayan sa Sugbo, kun dili, apil na sa ubang mga dapit.

Sigurado ko nga kini maoy buhaton ni Cebu City Mayor Tomas Osmeña isip usa sa paagi aron pagsulbad sa problema sa trapiko dinhi sa dakbayan sa Sugbo.

Daghan kaayo ang miawhag ni Osmeña nga estrikto na gyud nga ipatuman ang mga lagda sa trapiko kay dili ikalimod nga midagsang na kaayo ang mga badlungong drayber.

Aron pagtubag sa reklamo sa publiko batok sa mga drayber nga dili magpasiga sa ilang headlights samtang magpadagan diha sa karsada, angay'ng mugnaon ang team sa mga motorcycle-riding traffic personnel nga magpatrolya panahon sa gabii.

Pinaagi niini, masakpan kadtong mga drayber nga magpadagan sa ilang sakyanan nga dili magpasiga sa ilang suga ug makahatag lang og peligro ngadto sa ubang motorista ug sa mga tawo nga maglakaw.

Kun checkpoint operation, ang mga drayber mopasiga na man sila sa ilang headlights. Unsaon man gud, daghan pa man gyud ang mga ignorante nga mga drayber nga tuyoon gyud nga dili magsuga panahon sa gabii.

Klaro kaayo nga kining maong mga drayber wala magbasa sa mga lagda nga gilatid diha sa Republic Act 4136, ang Transportation and Traffic Code nga maoy sumbanan sa mga motorista.

* * *

Kay hakog man kaayo og Temporary Operators Permit (TOP) ang Land Transportation Office (LTO), bahala na og Traffic Citation Tickets ra ang iisyu sa mga madakpang drayber, basta kun dili nila bayaran ang ilang multahan lapas sa pito ka adlaw, pasakaan sila og kaso sa hukmanan.

Tan-awon nato og dili ba motagam kining maong mga abusado nga drayber. Kun dili nila tubagon ang kaso nga ipasaka kanila sa hukmanan, sigurado man gyud nga isyuhan sila og bench warrant sa korte.

Dili na angay'ng tiaw-tiawan kining mga drayber nga abusado kay mogara sila. Bisan gani ang mga konsehal nga alyado sa Team Rama, miawhag na ni Mayor Osmeña nga tinud-on ang pagpatuman sa balaod.

Nakabantay si Konsehal Raymond Garcia nga grabe na kaayo ang problema sa trapiko pagka karon. Ang laing konsehal nga alyado sa Team Rama mipadayag na usab nga dili sila mosupak kon ibalik ang towing operations.

Busa, angay'ng dalion na ni Mayor Osmeña ang paghimo'g lakang aron nga mabalik na ang towing operations kay daghan kaayo nga sakyanan nga anha ra i-parking sa mga karsada.

Angay usab nga ibalik sa CITOM ang kampanya batok sa mga sakyanan nga anha ra i-parking daplin sa karsada panahon sa gabii ngadto sa buntag. Mamalit gani ta og sakyanan kinahanglang naa kita'y grahe nga aron dili kita makahasol sa ubang motorista.

* * *

May mitaho kanako nga usa sa mga video karera nga gibutang sa likud nga bahin sa dakong tindahan diha sa Mambaling, ang kanhi nahimutangan sa Rubberworld, gisakmit sa mga polis.

Ang pangutana, nganong gibilin man ang ubang video karera? Unsa man to, pagpanghadlok ra? Alang kang Cebu City Police director Joel Doria kinahanglang mandoan nimo ang Mambaling Police Station nga pangsakmiton ang mga video karera, ug ang mga outlet sa illegal swertres diha sa ilang area.

Unya ang kapolisan sa Sawang Calero Police Station, wala usab magtagad sa daghang illegal swertres outlets ug video karera diha sa ilang area, ilabi na sa Barangay Suba, Pasil ug Sawang Calero.

Wala gani nila aksyoni ang video karera diha sa Belgium Street nga anha magyampungad ang mga drayber sa traysikad nga makabalda sa pag-agi sa mga sakyanan sa magtumod og isda ug sa mga mangumpra.

Sa Barangay Ermita sab, ang mga sakop sa Carbon Police Station wala gyud mohimo'g lakang sa mga video karera ug illegal swertres sa ilang dapit.

Pakitaa'g labok ang taga dakbayan sa Sugbo nga moaksyon ka sa ilang reklamo Senior Superintendent Doria Sir.