Pamangka sa duha ka suba

Ang Bisaya nga pangu sa Kongreso, si House Speaker Pantaleon Alvarez, ang niluwas nilang kanhi Cebu City Mayor Mike Rama ug sa partido ni Presidente Rodrigo Duterte nga PDP-Laban gikan sa bakikaw nga kahimtang. Sa iyang pagdeklarar dinhi sa Sugbo nga unya na makapanumpa sa partido sa administrasyon si Rama kon matangtang na siya sa listahan ni Duterte sa gipasanginlan nga mga protektor sa ilegal nga drugas:

• Nakalingkawas si Rama sa makalibog nga sitwasyon sa pagpasakop sa partido sa presidente kansang seryusong pasangil batok niya kusganon niyang gipanghimakak; ug

• Nakaikyas sang PDP-Laban sa makauuwaw nga pasangil nga pataka lang sila og dawat og bag-ong mga sakop bisan ang mga gitulisok ni Duterte og bangis nga krimen.

***

Mahimong nakatabang sa pagtin-aw sa sitwasyon ang panungog nga pangutana ni Cebu City Mayor Tommy Osmeña sa PDP-Laban kon unsay mas mahinungdanon nila–ang pagpalapad ba sa ilang partido o ang kampanya batok sa ilegal nga drugas?

Bisan gikatahong may dako nang kang-a sa relasyon nilang Osmeña ug Duterte kay nakasud na si Presidential Assistant Michael Dino sa tinuod nga mga hawod sa Malakanyang, maglisod ang administrasyon sa pagpasabot sa kaseryuso sa kampanya batok sa ilegal nga drugas kon ang mga gipasanginlan sa presidente nga nahilambigit sa mga sindikato sa ilegal nga drugas mahimong mahinungdanon nga haligi sa ilang politikanhong makinarya.

***

Di na sab kapasanginlan si Rama nga sama rang nikumpisal sa pasangil ni Duterte batok niya kon nahinayon pa pag-amen nilang Alvarez ug ubang kadagkoan sa partido sa presidente. Di na sab kadudahan nga nagdalidali pagpasakop sa PDP-Laban bisan sa gisubli-subli nga panumpa nga magpabilin siyang matinud-anon sa United Nationalist Alliance  ni kanhi Bise Presidente Jejomar Binay aron pagpadako sa kahigayonan nga matangtang sa labing daling panahon ang iyang ngan gikan sa listahan ni Duterte.

Mas lisod ipasabot ang kahimtang sa pipila ka sakop sa Team Rama nga nidayon gyod pagpanumpa isip bag-ong mga sakop sa PDP-Laban niadtong Sabado.

***

Nganong nakaako man sila pagbiya ni Rama nga maoy ilang pangu? Sa ilang pagbalhin sa PDP-Laban ila sang gikalawat ug gipaluyohan ang mga programa ug mga lakang sa administrasyon. Di sila makapangangkon nga hingpit nga nagpaluyo sa kampanya ni Duterte batok sa ilegal nga drugas, sa usa ka bahin; apan magpa-goryo-goryo sa pagkaapil ni Rama sa listahan ni Duterte sa gipasanginlang drug protectors, sa pikas nga bahin.

Mas masabot ang baruganan ni Konsehal Jun Alcover nga nagdumili pagpanumpa sa PDP-Laban tungod sa kaniadto pa ang higpit nilang panagsungi ni Duterte. Mas madawat sab sa mga Sugbuanon ang pagkumpisal ni Konsehal Dave Tumulak nga di siya makapasakop sa partido sa administrasyon kay naalarma na siya sa extrajudicial killings.