TOP ang kinahanglan

Wala malilong nga grabe na kaayo karon ang problema sa trapiko ug angay na gyud kini nga hatagan og diha-diha nga pagtagad.

Ang pagdestino og mga traffic enforcer dili gani makasulbad sa problema sa trapiko, apan arang-arang na lang kay mabadlong man kadtong mga abusadong motorista.

Apan kun ang mga traffic enforcer armado lang og traffic citation ticket, kataw-an ra sila sa mga drayber ug dili mahadlok kay dili man masakmit ang ilang lisensya kun citation ticket ra ang iisyu kanila.

Aron epektibo ang kampanya batok sa mga abusadong drayber nga dili motuman sa tukmang lagda sa trapiko, mas nindot nga hatagan ang mga traffic enforcers ug ngipon.

Ubos sa Republic Act 4136, ang Transportation and Traffic Code, nagtugot ra kini nga masakmit ang lisensya sa drayber kun isyuhan sila og Temporary Operators Permit (TOP) sa mga nagdakop kanila.

Kadaghanan sa mga traffic enforcers nga sweldado sa mga Local Government Units, gipang-isyuhan ra og traffic citation ticket ug dili TOP kay dili man sila deputized agents sa LTO.

Ang kadagkoan sa LTO estrikto usab kaayo kay bisan gani ang mga polis magpanagana pa sila pag-isyu og TOP kay nahadlok nga gamiton sa pagpanguwarta.

Para nako, kinahanglan nga ang Kongreso mohimo og kausaban sa Republic Act 4136 aron tugotan na ang mga traffic enforcers sa LGU nga makasakmit sa lisensya sa mga drayber.

Apan hinuon, duna ni problema tungod kay dili man centralized ang lugar nga adto itugyan ang mga lisensya. Dili sama kun ang LTO deputized agents ang makasakmit sa lisensya nga adto gayud kini tugpa ang lisensya sa operations branch sa LTO regional office.

Ang nindot tingali mao nga ang mga traffic enforcer, basta masuta nga makamao lang kini mopatuman sa balaod, isyuhan na lang   gyud og TOP aron nga moislag ang mga abusadong drayber.

Unya, kinahanglan nga ipatuman ang lagda diha sa Republic Act 4136 nga kun ang usa ka drayber madakpan, unya makunbikto, og labing menos katulo ka higayon sa usa ka tuig, mahimong suspensuhon ang lisensya niini sa gidugayon nga dili molapas sa duha ka tuig.

Ang giisip nga “kunbikto” mao ang pagkakunbikto sa korte ingon man ang pagbayad sa dinakpang drayber sa multa base sa iyang salaod kay miangkon siya nga nakahimo og sayop.

Bi, kinsa man kaha nga drayber ang dili mahadlok nga suspensuhon ang iyang lisensya balig duha ka tuig? Kun kining maong lagda ipatuman, paminaw nako puwerteng buotana sa mga drayber ug dili gayud moabuso kay aron dili madakpan.

Karong panahona gud, daghan kaayong mga nagmaneho og sakyanan nga wala gyud tawon masayod sa tukma nga balaod sa pagmaneho’g sakyanan mao nga nakatampo kini sa kahuot sa atong kadalanan.

Bisan pa og anaa ang mga sakop sa Task Force Alpha mitabang sa mga traffic enforcers dinhi sa dakbayan sa Sugbo, apan dili gayud kini makapahadlok sa mga abusadong drayber.

Hinuon, kun ang mga traffic enforcers, apil ang Task Force Alpha, isyuhan og mga TOP, sigurado nga magpanagana na ang mga drayber sa paghimo’g salaod sa pagmaneho.

***

Daghan ang mireklamo nga adunay mga traffic enforcers nga dili na renyohan sa ilang mga kontrata ug kutob na lang sila karong tapus sa buwan.

Tingali, ang uban niining maong mga traffic enforcers mga tapolan manakop ug ang uban maayo lang sa porma. Kadaghan ko makakita og mga traffic enforcers nga igo lang magpalandong diha sa aseras ug dili gani makamao moderiher sa mga motorista.

Sama pananglit diha sa eskena Sudlon ug Gorordo Avenue sa Lahug, adunay traffic enforcer nga anaa ra sa aseras. May traffic enforcer sab nga kanunay magpalandong diha sa usa ka repair shop sa mga motorsiklo sa dalan D. Jakosalem duol sa Basilica.

Kining matanga sa mga traffic enforcers maoy angay nga taktakon.