Panglaktod sa balaod Molupyo

Molupyo sa Labangon, Cebu City nanawag sa Arangkada sa DYAB Abante Pa, Bisaya! pagsumbong nga gipatay sa mga polis ang iyang igsuon nga tiggamitan og ilegal nga drugas bisan wa mosukol. Matod niya gilungkab sa kapolisan ang pultahan sa ilang bay niadtong Lunes sa hapon ug gidiretso pagpusil ang iyang igsuon.

Labawng nakapait mao nga dihang nihagsa na ang patayng lawas sa iyang igsuon nikalit lang og tumaw ang rebolber ug pipila ka pakete sa shabu ug gibinlan pa og pasangil nga gawas nga nagdumili pagpadakop mao pa gyoy unang namusil maong napugos ang mga polis sa pagpanalipod sa ilang kaugalingon. Apan ang nagbangotan nga mga paryente way plano nga mokiha.

***

Segun sa nanawag namo nahibawo ang ilang pamilya nga wa silay mahimo batok sa mga polis nga nanglaktod sa balaod. Kay igo lang mangangkon nga nagsunod sa sugo sa ilang kadagkoan sa paglusad og agresibong kampanya batok sa ilegal nga drugas.

Wa tuod sila sugoa nga patyon ang tanang gidudahan nga mga durugista apan gipasidan-an sab nga di maghuwat nga maunhan busa kinahanglan nga panalipdan ang ilang kaugalingon. Ug ning atong panahon ang gidaghanon sa manghay-ad nga mga patayng lawas sa gidudahang mga durugista nahimo nang sukdanan sa mga pangangkon sa kalamposan sa gubat batok sa mga sindikato sa ilegal nga drugas.

***

Labing dakong babag sa bisan pagsuway nila pagpangita og hustisya mao ang talagsaong popularidad ni Presidente Rodrigo Duterte. Kinsa nakakuha sa makabungog nga mayoriya sa niaging piniliay tungod sa iyang saad pagpapas sa ilegal nga drugas ug bangis nga mga krimen sud lang sa tulo ngadto sa unom ka buwan.

Busa si bisan kinsang mokuwestiyon sa iyang kampanya, apil nang mga mangahas sa pagpasangil nga may inosente nang mga kinabuhi nga naligsan sa iyang gubat batok sa mga durugista ug mga kriminal, kuninitan sa lunod-patay niyang mga dumadapig nga niisip ni Duterte nga maoy labing takos nga makapatuman sa kausaban nga hagbay ra nilang gipangandoy.

***

Apan ang biktima sa Labangon di maoy kataposan. Tungod sa pinatuyangan nga kampanya batok sa ilegal nga drugas, daghang manakay aron pag-angkon og pasidungog o aron pagpaningil sa personal nga mga atraso.

Mahimong moabot ang adlaw nga bisan ang mga sinaligan ni Duterte maigo na sa kampanya: May mga kadugo o kaila nga diretsuhon lang sab og pusil ug patay bisan nasaypan lang. Ug nianang higayona di na mahudlat ang mga nanaway sa kampanya. Makaangkon na sila og igong gidaghanon ug panaghiusa sa pag-insistir nga hunungon na ang pagpanglaktod sa balaod. Nga nakahimo na sa mga polis ug mga sundawo nga wa nay kalainan sa labing bangis nga mga kriminal nga ilang gigukod.

[email protected].