Wa pa kairog si Cayetano

Inay modawat sa iyang kapildehan pagka presidente sa Senado, human napilde sa pagka bise presidente sa nasud, si Senador Alan Peter Cayetano nagpadayon sa pagpangintriga:

Nipasumbingay siya nga si Senate President Koko Pimentel mahimong nagpagamit sa mga puwersa nga supak sa administrasyon ni Presidente Rodrigo Duterte;

Nipasangil sa iyang kaubanang senador nga nagtinguha sa pagsabotahe sa mga programa sa kausaban ni Duterte nga nakadawat og makabungog nga mayoriya sa makasaysayanong piniliay niadtong Mayo 9; ug

Sa tanang senador, siya ra ang takos sa tinuoray nga pagduso sa labing dinalian ug mahinungdanong mga balaudnon nga gikinahanglan pagpatuman sa mga saad ni Duterte sa niaging piniliay.

* * *

Hangtod sa kataposang gutlo sa panagtigi sa liderato sa Senado nagdumili pagtahan si Cayetano. Wa gyod gani motunga bisan sa pormal nga pagsugod sa sesyon sa bag-ong Senado dayong pahigayon sa State of the Nation Address ni Duterte niadtong Lunes.

Apan ang bisan unsang pagduda nga ganahang isablig ni Cayetano sa kahingpit sa pagdaog ni Pimentel batok niya napapas sa pagkumpisal ni Senador Cynthia Villar, asawa sa pangu sa Nacionalista Party nga si kanhi senador Manny Villar, nga nakahukom ang partido sa pagpaluyo ni Pimentel tungod sa awhag ni Duterte. Kon mao, kinsa na man lang diay ang nahibilin nga niabiba ni Cayetano?

* * *

Bisan sa kaugalingong bersiyon ni Cayetano pagpasabot sa iyang ikaduhang sunudsunod nga kapildehan, nitumaw nga napakyas siya pagkuha sa suporta sa mayoriya sa mga senador tungod sa iyang pag-insistir nga hingpit nga suportahan sa kinatibuk-ang institusyon ang pamunoang Duterte. Nga bisan ang pagduma sa nagkalainlaing mga komitiba iyang giawhag nga ipahaom sa kagustohan sa presidente.

Nainsulto sa kampanya ni Cayetano ang mga senador nga nabantog sa ka-independente sa ilang panghunahuna. Maong wa maglisod si Pimentel pag-umol dayon og mayoriya sa pasiuna pa lang nga hugna. Wa katabang sa kawsa ni Cayetano ang pag-insistir nga siya ang labing sinaligang tigpatuman sa plataporma ni Duterte.

* * *

Nabantang nga si Pimentel mas lubay kay ni Cayetano sa pag-atiman sa mga sentimento sa ilang kaubanan nga mahimong mosukwahi sa Malakanyang. Bisan gibugalbugalan ni Solicitor General Jose Calida ang awhag ni Senador Leila de Lima pag-imbestigar sa sunudsunod nga pagpamatay sa gipasanginlang mga durugista, si Pimentel niangkon nga di kapugngan silang de Lima ug kaubanan kon ganahan gyong mangimbestigar.

Gawas ni Pimentel, si Cayetano unta ang kataposang mopug-ok og mga imbestigasyon. Kay ang kontrobersiyal nilang imbestigasyon sa Senate Blue Ribbon subcommittee maoy nakapahagsa ni Bise Presidente Jejomar Binay. May konsuylo hinuon alang ni Cayetano. Gitak-opan ang sesyon sa Senado karong semanaha nga wa mahatag ngadtong de Lima ang iyang gitinguha nga pagduma sa Senate Committee on Justice, nga maoy moduma sa imbestigasyon.