Wa’y kampanya sa sugal

Dili malalis nga nindot kaayo ang mga pasiunang kalampusan ni Presidente Rodrigo Duterte sa kampanya batok sa gidiling matang sa drugas.

Kaliboan ka tawo nga mga tigbaligya ug mga tiggamitan og gidiling matang sa drugas sa lainlaing dapit sa nasud mitahan sa kapolisan, samtang napatay sa engkuwentro kadtong mga misukol.

Kadtong mga drug lord nga nailhan na apan gipasagdan lang sa nangaging administrasyon, karon nagtago-tago na, ug ang uban tua na kuno sa laing nasud.

Didto sa Luzon, adunay usa ka Chinese national nga financier og shabu laboratory napatay sa mga polis kay kuno misukol dihang gironda ang iyang laboratory.

Usa kini sa gipasigarbo ni Duterte sa iyang State of the Nation Address  kagahapon. Kabahin kini sa iyang gisaad atol sa kampanya nga sulbaron niya ang problema sa drugas sulod sa unom ka buwan.

Buyno, karon pa lang tuod, usa ka buwan gikan sa iyang paglingkod isip pangulo sa nasud, nagkurog na ang mga tawo nga kaniadto maoy gikalisangan.

  * * *

Apan samtang abtik ang mga polis nga mihimo'g kampanya batok sa mga drug pushers, dili usab unta nila kalimtan ang uban nila nga gimbuhaton.

Kini mao ang paglusad og hugtanay usab nga kampanya batok sa mga gidiling matang sa sugal, sama sa illegal nga swertres nga mikatap pag-ayo karon sa lainlaing dapit.

Nganong wala man kini himoi og kampanya sa atong kapolisan? Ipatubag nato kini sa bag-ong hepe sa Cebu City Police Office nga si Senior Supt. Joel Doria ug ni Police Regional Director Noli Taliño.

Gawas sa illegal swertres, anaa pa ang mga video karera ug moli-moli nga mikatap pa gihapon sa mga slum areas dinhi sa dakbayan sa Sugbo, ug bisan na diha sa Talisay base sa mga report nga akong nadawat.

Dili angay'ng magkuyogpos lang ang atong kapolisan sa illegal nga sugal. Walay hunong ang mga report nga akong nadawat bahin sa illegal nga sugal.

Sa akong programa sa radyo kada gabii, daghan kaayo ang mopahibalo kanako sa mga illegal nga kalihukan, sama sa sugal ug pagpamaligya og gidiling matang sa drugas.

* * *

Gipanghulipan ni PNP Chief Ronald Dela Rosa ang mga opisyal sa kapolisan dinhi sa Sugbo, apil na kadtong mga aktibo kaayong mikampanya batok sa gidiling matang sa drugas.

Giangkon mismo ni Dela Rosa nga pipila niadtong mga gihulipan sa ilang katungdanan giingong mga protektor sa mga drug lord ug sa mga pusher.

Mahibulong kaayo kita kon ngano nga gipasagdan ra man lagi nila ang mga sakop sa Philippine Drug Enforcement Agency nga ania madestino sa Sugbo, ug walay maayong agi sa kampanya batok sa gidiling drugas?

Ang PDEA direkta nga ubos sa pagdumala sa Office of the President, apan wala man lagi sila balhina ug ilabay sa mga lagyong dapit sa nasud?

Kini maoy hinungdan nga usahay mosantop sa akong kaisipan kon wala ba kaha balhina sa lagyong mga dapit kadtong mga polis nga aktibo mohimo'g kampanya batok sa drugas aron makaginhawa na ang mga druglords dinhi?

Kon ako maoy Duterte, kon dili nako panaktakon sa katungdanan kining mga sakop sa PDEA dinhi sa Sugbo, ilabay ko usab sila ngadto sa Cordillera region ug sa ubang dapit.

Awhagon nako si Presidential Assistant Michael Lloyd Dino nga hinuktokan niya pag-ayo kining maong punto kay salikwaot kaayo nga huna-hunaon nga kadtong mga polis nga abtik sa kampanya sa drugas, gilabay sa lagyong lugar, unya ang PDEA nga walay maayong agi, gipasagdan ra.

Kon tan-awon nimo sa papel, tanang kalampusan sa kapolisan ug ubang law enforcement units, apil gyud ang PDEA, kay aron dili ma-technical ug dili ma-dismiss ang kaso.

Gilatid man sa balaod nga ang mga kampanya batok sa gidiling matang sa drugas, kinahanglang "coordinated" gyud sa PDEA, mao nga sa report ibutang gyud kana kanunay nga apil ang PDEA sa ilang operation.