Mas dakong lalis sa Con-Con

Kon nahibung ka nganong wa pay kisaw sa piniliay sa barangay ug Sangguniang Kabataan nga tulo ka buwan na lang gikan karon, ang kahigayonan nga mauswag na sang piniliay maoy posibleng katin-awan. Bisan asang barangay ka masum-ok, ang mabantang mao lang gihapon ang posters sa mga nanagan sa piniliay niadtong Mayo 9. Wa pay bisan usa nga nagpasumbingay nga managan, gawas lang sa mga makapapili pa pag-usab, sa dinungan nga piniliay nga gitakda karong Oktubre 31.

Nikumpisal si Senador Bam Aquino, usa sa mga nidasig sa mga batan-on pagpaluyo sa inusab nga SK, nga may mga sugyot ang mga senador ug mga kongresista pag-uswag sa piniliay unya sa Enero 2017.

***

Usa sa gikonsulta sa mga sakop sa Kongreso sa kahigayonan sa pagsuspenso sa piniliay karong Oktubre 31 mao si Chairman Andres Bautista sa Commission on Elections. Kinsa niingon nga nagpakisayod ang mga magbabalaod sa mosunod:

Unsay kausaban nga kinahanglang himuon sa mga balota ug unsay mga kalibog nga mahimong motumaw sa manu-mano nga botasyon ug iskutenyo kon idungan ang SK ug barangay sa piniliay sa mga delegado sa constitutional convention (Con-Con);

Pilay madaginot sa gobyerno kon dunganon inay buwagon ang tulo ka piniliay (SK, barangay ug Con-Con); ug

Duna pa bay igong panahon pag-apas sa Con-Con sa piniliay sa SK ug barangay.

***

Inigkahuman sa labing State of the Nation Address  ni Presidente Rodrigo Duterte karong Lunes, ang pagpatawag og Con-Con aron paghupot sa federal nga sistema sa gobyerno ang usa sa labing unang tukion sa Senado ug sa House of Representatives. May duha na ka nag-ung-ong nga resolusyon sa Con-Con:

Ang bersiyon sa House gipangamahanan ni incoming Speaker Pantaleon Alvarez; samtang

Ang bersiyon sa Senador gipangamahanan ni outgoing Senate President Franklin Drilon.

Gipaboran ni Duterte ang Con-Con aron ang katawhan maoy mopili sa mga delegado, inay sa sugyot nga mga senador ug mga kongresista ang mousab sa konstitusyon pinaagi sa constituent assembly (Con-Ass).

***

Hinaot nga di mahawongan ang kamahinungdanon sa mga piniliay sa SK ug barangay sa mas daghang kontrobersiya sa pag-usab sa batakang balaod. Hinaot nga di maibanan ang kadasig sa pagpili sa mga tagduma sa SK ug mga barangay tungod sa mas init nga lalis angay na bang usbon ang konstitusyon.

Ambot matabonan ba sa talagsaong popularidad ni Duterte ang naandan nga lapad nga kabalaka sa pagbukas sa 1987 Constitution ngadto sa bisan unsang kausaban nga mahimong mahunahunaan sa Con-Con. Kansang mga delegado kon makalingkod na may hingpit nga gahom sa pagpili unsay ilang usbon–sama sa mga probisyon sa term limits ug sa ekonomiya–gawas sa giapura ni Duterte nga paghupot sa federal nga sistema sa gobyerno ug kanus-a sila mahuman.