Pagpaubos ni Robredo

Nakigtagbo si President-elect Rodrigo Duterte ni Senador Bongbong Marcos nga napilde pagka bise presidente sa niaging piniliay sud sa upat ka oras. Apan wa siyang kagahin bisan usa na lang ka gutlo sa pakigtagbo ni Kongresista Leni Robredo nga maoy nidaog pagka bise presidente sa piniliay niadtong Mayo 9.

Usa sa labing unang nakigtagbo ni Duterte human naklaro ang iyang kadaogan mao ang negosyanteng si Lucio Tan, bisan iyang ginganlan nga usa sa nisuway og amot apan iyang gilikay-likayan sa niaging kampanya. Apan lima ka adlaw ug moasumir na sila sa katungdanan wa pa gyud tagda ni Duterte ang dugay nang hangyo ni Robredo pakigtagbo niya.

***

Nakigtagbo na si Duterte sa mga rebeldeng komunista nga girepresentahan sa tigpamaba sa National Democratic Front nga si Fidel Agcaoili. Gani nagtigom nang iyang mga representante ug silang Jose Ma. Sison sa Communist Party of the Philippines ug Luis Jalandoni sa NDF sa Oslo, Norway. Nakigtagbo na sab si Duterte sa mga opisyal sa Moro Islamic Liberation Front ug sa Moro National Liberation Front.

Angay’ng hangpon ang sabutsabot sa kalinaw uban sa mga rebelde. Apan kun determinado si Duterte nga makigsulti sa armadong mga grupo nga gipasanginlan og mga pangatake ug pamombardiyo sa mga instalasyon sa gobiyerno, nganong di man siya ganahang makigsulti ni Robredo kansang labing seryusong atraso mao ra’ng pagkasakop sa Liberal Party?

***

Gitanyagan nang Duterte si Marcos og katungdanan sa gabinete human sa usa ka tuig nga ban sa mga napilde sa niaging piniliay paghupot og katungdanan sa gobiyerno. Apan nagdumili siya pagtanyag og bisan unsang katungdanan ngadto ni Robredo bisan way lagda nga nagdili nga makalingkod sa gabinete ang ikaduhang labing taas nga opisyal sa nasud.

Gitudlo nang Duterte ang iyang mga higala, kauban sa klase, mga sakop sa partido, mga nakatabang sa kampanya ug bisan mga paryente ug kaila sa iyang mga kaila. Apan way nahunahunaan nga puwesto parang Robredo bisan nailhang mas takos kay sa iyang mga tinudlo.

***

Way makapugos ni Duterte pagpaminaw ni Robredo. Si Robredo nahibawo nga di mahimong moapil siya sa taas nga linya sa Davao City sa mga namasin nga tagdon ni Duterte, samang di kapamugos paghupot og tinudlo nga puwesto. Hingpit ang gahom ni Duterte pagpili sa iyang mga kasaligan.

Maong wa manglawgaw si Robredo. Wa motukol bisan kaikog rang Marcos ang rason ni Duterte sa wa pagpakigtagbo ug pagtudlo niya. Niduko sa pag-insistir ni Duterte nga buwag ang ilang inugurasyon. Nitakda og mas sayo nga panumpa sa Quezon City sa Hunyo 30 aron nga di mosapaw sa mas gikahinaman nga inugurasyon ni Duterte sa Malakanyang. Ang katawhan maoy moganti sa iyang pagpaubos.