Unsa gyud diay ang balaod?

Tambag nako sa mga opisyal sa barangay nga giisyuhan og mga sakyanan sa Cebu City Hall nga iuli usa na ninyo uy kay aron mahimoan og imbentaryo.

Wala man kaha na ihatag sa barangay ang maong mga sakyanan? Gihatag na ba gud na sa barangay? Ang pagpa-recall ni Cebu City Acting Mayor Margot Osmeña sa maong mga sakyanan aron kini maimbentaryo.

May posibilidad hinuon nga kadtong mga sakyanan nga giisyu ngadto sa mga konsehal nga dili na kini ibalik kanila. Daghang sakyanan sa City Hall nga wala itugyan sa mga kapitan.

Sama pananglit sa Labangon nga ang mga sakyanan gikan sa City Hall didto giisyu sa konsehal sa barangay imbes adto sa kapitan. May barangay sab sa bukid nga ang usa ka konsehal giisyuhan og sakyanan kay maoy gigamit-gamit sa pangampanya.

Bisan og ako naman ang mayor, bawion gyud nako ang maong mga sakyanan aron magamit kini sa husto ug dili kaabusohan ang butang sa kagamhanan.

Hangtod karong adlawa lang ang tagal ni Acting Mayor Osmeña ngadto sa mga giisyuhan og sakyanan nga nagdumili sa pag-uli. Maayo nga patilawon sila og "lami" aron madisiplina.

Basin og wala sila masayod nga ang balaod nagkanayon nga kadtong mga opisyal ug kawani sa kagamhanan, o bisan kinsa nga giisyuhan og butang sa gobiyerno, sad-an sila sa kaso nga Malversation of Property kun dili sila mouli human kini gidemanda nga bawion gikan kanila.

* * *

Uy, unsa kining report nga akong nadunggan nga si Dr. Rowena Burden nga supporter ni presumptive President Rodrigo Duterte puwerteng nakayawyaw kay gipasanginlan siya sa iyang mga kauban nga ginegosyo ang pagka supporter niya ni Digong?

Buyno kay anaa na man gyud kini sa Facebook, mas nindot gyud tingali nga ipasabot na lang ni Dr. Burden ngadto sa publiko kun tinuod ba nga gipamaligya niya'g tag P5 ang mga ballers nga imbes ipanghatag kini nga libre.

Walay kaso sa T-shirt kun ibaligya kini nga dili lang kaayo mahal kay basin og ang prisyo pangbawi lang sa kantidad pagpalit sa T-shirt ug sa pag-imprinta. May mipasangil sab nga gipabayran kuno og P25 sa grupo ni Dr. Burden ang mga Duterte volunteer ID.

Aw, mahimo man sab nga kun tinuod nga ang grupo ni Dr. Burden namaligya sa maong mga butang, basin og ang halin gigamit ra gihapon nila sa pagtabang sa kampanya ni Duterte.

Kining tanan, angay'ng ipasabot ni Dr. Burden kay sigurado ko nga dili malipay si Duterte kon makadungog niini. Nakadungog ko nga gipang-uli man gani ni Duterte ang ubang donasyon nga iyang nadawat nga wala mahurot og gasto sa kampanya.

Dili usab tingali modaginot ug ginagmay'ng kantidad si Dr. Burden kay doktor man siya sa usa ka dakong private hospital sa dakbayan sa Sugbo. Apan angay'ng itataw lang gyud niya kining maong isyu.

* * *

Wala kaha masayop ang Pag-asa sa ilang pagbana-bana sa panahon nga ang grabeng huwaw moabot pa kuno sa Hunyo?

Mura'g bana-bana nako misugod na man ang ting-uwan. Gani kagahapon, naglunop na man ang pipila ka karsada sa Minglanilla ug kanait nga mga dapit.

Angay kita nga malipay kon nasayop lang ang Pag-asa sa ilang pagbana-bana kay nagpasabot kini nga mobalik na ang naandang supply sa tubig ingon man mabuhi na ang mga tanom sa mga mag-uuma.

Apan kon matinuod man nga misugod na ang ting-uwan sukwahi sa bana-bana sa Pag-asa nga molungtad pa ang huwaw sa Hunyo, yam-iran na usab sila sa katawhan.

Unsaon, bana-bana ra man gyud intawon ang ila sa Pag-asa kay kuwang man sila og kahimanan.

* * *

Nindot ang kampanya ni Cebu City incoming Mayor Tomas Osmeña nga hingusgan ang kampanya batok sa gidiling drugas. Mura'g nalantawan nako nga mangalipay na gyud ang mga tawo.

Maayo gyud nga estriktohon ang mga drug pushers. Sa ato pa, kon mosukol sila, aw tukma lang nga dili magpanuko ang kapolisan pagpatay kanila.