Isog nga tingog sa Mindanao
Daghang nakadayeg ni Cagayan de Oro Archbishop Antonio Ledesma nga maisugong nidapit sa pagtagad sa mga botante sa giisip nga usa sa labing lig-on nga teritoryo ni Davao City Mayor Rodrigo Duterte sa mga sukaranan nganong angay siyang isalikway sa piniliay karong Lunes.
Mga nakaila ni Arsobispo Ledesma wa hinuon mahibung. Si Ledesma, 73, usa sa labing takos ug makinaadmanon nga haligi sa Simbahang Katoliko. Usa siya ka Jesuit (Society of Jesus), gradwadong magna cum laude sa Ateneo de Manila University. Naghupot sab og master's degree sa political science gikan sa University of the Philippines ug doctorate sa development gikan sa University of Wisconsin-Madison.
Nangahas ko paghubad sa pipila ka mahinungdanong bahin sa iyang pastoral letter:
***
"Ang konsiyensiya, sa akong panghunahuna, mao ang una ug labing mahinungdanon nga sukaranan. Ang kandidato kinahanglan nga ligdong ug matinud-anon. Iyang gisunod ang sulti sa iyang konsiyensiya nga motug-an niya unsay sakto ug sayop. Iyang gitahud ang tawhanong katungod sa matag usa. Manubag siya sa pagtuman sa katungdanan.
"Ang mga kandidato nga wa mousab sa ilang kaugalingon ni magpuyo og moral nga mga kinabuhi di angay ug di takos sa pag-usab sa katilingban. Ang kausaban manukad sa matag usa nato.Kita isip katawhan ang makausab sa katilingban. Maong angay tang mopili pinasikad sa konsiyensiya ug mopili sa mga kandidato nga may konsiyensiya.
***
"Karong bag-o, nakadawat ko og makahasol nga taho gikan sa Davao City. Sa katuigan gikan sa 1998 hangtod sa 2015, ang Commission on Human Rights (CHR) ug Human Rights Watch (HRW) nakadokumento og 1,424 ka kaso sa laktod nga pagpamatay. Ang mga biktima naglakip sa 132 ka bata (nagpangedaron og 17 paubos).
"Way bisan usa sa responsableng mga sakop sa gitawag nga Davao Death Squad ang nadakpan. Ang nag-unang responsibilidad sa wa pagsulbad sa mga krimen ila sa Mayor ug lokal nga mga opisyal. Ang dakbayan nga naghupot sa ingon ini kadaghang kaso sa wa masulbad nga mga pagpamatay di matawag nga dakbayan sa kahusay ug kalinaw.
***
"Ang laktod nga pagpamatay nagpalambo sa kultura sa kamatayon nga ilegal, imoral ug sala. Ang tawhanong kinabuhi balaanon gikan sa yugto sa pagpanamkon hangtod sa kasarangan nga kinutoban. Batakang tawhanong katungod ang pagpakabuhi. Ang laktod nga mga pagpamatay nga way napasaka nga pormal nga mga kaso ni makiangayon nga proseso sa paghusay di katugotan–bisan kon ang mga biktima gidudahang mga kriminal, mga rebelde o mga welgista.
"Isip nga Kristohanon, bililhon alang nato ang kamatinud-anon sa kaminyuon. Ang pagpanapaw sala ug imoral, kalapasan sa ikaunom ug ikasiyam nga sugo. Unsaon man sa usa ka tinuod nga Kristiyano, sa iyang konsiyensiya, makabotar nila nga nipadaylang sa ilang mga pagpanamastamas sa kaminyuon?"
- Latest
