Maniobra sa administrasyon?

Usa nako ka higala miingon nga siguradong modaog gyud si Mar Roxas sa eleksyon karong Lunes tungod sa matud pa niya makinarya ug sa pagmaniobra sa administrasyon.

Timailhan kuno niini mao ang gipagawas nga labing ulahing survey nga hinay-hinay na nga naapsan ni Leni Robredo si Bongbong Marcos pagka bise presidente.

Si Roxas ‘sab kuno, bisan og biya pa ni Rodrigo Duterte apan makita sa survey nga nagsaka ang iyang rating ug naunhan na gani niya’g gamay sila si Grace Poe ug si Jejomar Binay.

Sa akong tan-aw, mahimong tungod sa makinarya sa Partido Liberal nga daghang opisyal sa mga probinsya ug siyudad ang sakop niini, maoy nakaingon nga misaka ang rating ni Roxas, ug dili kay mihimo’g maniobra.

Gituohan man gani nga sa adlaw sa eleksyon, motiurok na ang popularity rating ni Duterte kay ang mga tawo nakasabot na paghinay-hinay sa epekto kon sila mosuporta kang Duterte.

Ilang nalantawan nga daghan kaayo’g kontra si Duterte sa mga kauban niyang “heads of states” kon siya mapili pagka presidente, ug apil kitang katawhan ang maapektahan.

Makita man gud nga si Roxas ug si Poe maoy mga kandidato nga walay anomaliya mao nga gitan-aw sa uban nga sa katapusan, silang duha maoy magsangka kinsa kanila ang gamhanan.  Pagka bise presidente, makita nga wala gyud maguba ang pagkatawo ni Bongbong bisan sa pagdaot nga iyang mga kaatbang nga dili siya maayong suportahan kay anak sa kanhi diktador.

Mao kini ang rason nga nagtigi sila si Leni Robredo kon kinsa ang modaog. Apan si Chiz Escudero nga takus usab kaayo sa pagka bise presidente nagpabilin nga hulga nila ni Leni ug Bongbong.  Tan-aw nako, silang tulo maoy mag-ilogay pagka bise presidente.

* * *

Giendorso sa Iglesia ni Cristo (INC) sila si kanhi Mayor Tomas Osmeña ug Vice Mayor Edgardo Labella nga maoy pasuportahan sa ilang mga sakop pagka mayor ug bise mayor dinhi sa dakbayan sa Sugbo atol sa eleksyon karong Lunes.

Abtik kaayong nakapasalamat si Tommy ngadto sa kadagkoan sa INC ug mipasalig nga kon modaog siya sa eleksyon, hatagan niya og dakong pagtagad ang mga panginahanglan sa INC bisan og sila maisip lang nga minority group.

Atong panid-an kon unsay epekto niining pag-endorso sa INC ngadto nila ni Osmeña ug Labella. Matud ni Tommy nga walo lang kanilang mga kandidato sa BOPK ang giendorso sa INC, apil sila si Kongresista Raul del Mar ug Rodrigo Abellanosa.

Kon mao kini, lima ra sa mga konsehal sa BOPK ang giendorso sa INC. Ang akong tinubdan sa INC wala sa iyang opisina kagahapon ug wala makahinumdom sa mga konsehal nga giendorso sa ilang grupo.

Ambot og unsa kaha’y reaksyon ni Mayor Michael Rama nga wala siya giendorso sa INC kay dihang akong gitawgan, wala man motubag. Sa miaging eleksyon kaniadtong 2013, si Osmeña giendorso gihapon sa INC apan pilde man siya ni Rama.

Akong gipangutana si Osmeña bahin niini ug ang iyang girason mao ang grabeng blackmail sa pundok sa iyang kontra nga kuno siya hapit na mamatay ug dili na angay’ng botohan.

Buyno, para kanako, interesting gyud kaayo ang pagka mayor dinhi sa dakbayan sa Sugbo. Sa mga konsehal hinoon, mura’g klaro na man kon kinsa ang modaog ug kon kinsa ang mapilde.

Aw sila si Del Mar ug Abellanosa, mura’g lisud pildehon sa ilang mga kaatbang kay nakasukad na.

* * *

Buyno, pahimudsan na lang nako ang pag-awhag sa mga botante nga ayoha gyud intawon ninyo ang pagpili og presidente, bise presidente, mga senador, kongresista, mayor, bise mayor, gobernador, bise gobernador, board members ug mga konsehal.

Ayaw gyud ibase ang inyong pagpili og kandidato sa kasikat sa kandidato ug sa pagtuo nga isog kini kay magsige lang og isa sa iyang kinumo.

Husto gyud ang giingon sa uban nga moabot ra ang adlaw nga magmahay kamo sa inyong sayop nga desisyon.