Desperadong alkontra ni Duterte
Desperado ang mga kaatbang ni Davao City Mayor Rodrigo Duterte. Usa ka semana na lang sa di pa ang piniliay ug ang double digit nga labaw ni Duterte wa mohiyos bisan sa law-ay niyang pasiaw mahitungod sa gilugos ug namatay nga Australian missionary, bugal-bugal sa mga tawong may kakulian ug sa tanan niyang balikas.
Maong sa usa ka pamilok nakalimtan sa iyang mga kaatbang ang karaan nilang panagsungi ug nisentro sa tanang paningkamot pagbira ni Duterte paubos. Lisod tuohan nga silang Bise Presidente Jejomar Binay, Senador Grace Poe ug kanhi Interior secretary Mar Roxas nagkauyon sa labing dinaliang kawsa: Pagbaraw sa kaatbang nga way nagpaabot nga makapilde nila.
* * *
Ang expose ni Senador Antonio Trillanes sa bank accounts ni Duterte kabahin sa desperado nilang mga lakang. Bisan kinsa pay utok, si Trillanes ang labing takos nga mohimo ini. Gigamit niya ang samang taktika nga nakapatibugsok sa gituohan niadto nga di na kapugngan nga kadaogan ni Binay.
Unsay mahimo ni Duterte? Kun mangutana siya og basketball coach, tambagan siya nga ang pagdribol sa bola maoy labing epektibong paagi pagpanalipod sa iyang labaw hangtod mapupos ang oras. Mao nay gihimo ni Binay ug tan-awa unsay iyang gidangatan. Naabtan hinuon og kapin sa tuig una nakadut ang mga pasangil batok niya.
* * *
Dako ang tentasyon alang ni Duterte pag-usab sa istorya. Dugangan ang iyang pasalig sa kausaban ug mga balikas sa nahibiling walo ka adlaw sa di pa magpanon ang mga botante sa mga presinto. Maong inay ablihan ang bank accounts gihagit si Trillanes paghimo una og affidavits ug pagnotaryo sa tanan niyang pasangil.
Apan mat-an pa sa pinya si Trillanes. Ginamit ang abundang kasinatian sa kumbati nilang Binay, gisumbalik paghagit si Duterte nga magkita sila sa BPI Julia Vargas branch sa Pasig karong Lunes aron susihon pilay sud sa bank account – P17,000 ba suma sa banabana ni Duterte o P2.4 bilyones ba suma sa pakisusi ni Trillanes.
* * *
Si Senador Serge Osmeña, nga gikonsulta ni Duterte sa iyang kandidatura unom ka buwan ang nilabay, nipasabot nga makainsistir si Duterte pagtago sa iyang bank accounts ubos sa Anti-Money Laundering Act (AMLA). Apan gitataw sang Osmeña nga atubangan sa piniliayng presidensiyal di kalikayan ni Duterte ang pasangil sa money laundering.
Kun mapamatud-an ang dagkong deposito, bisan di pa kaabot og binilyon, maigo si Duterte. Maggusbat ang pagtanyag sa iyang kaugalingon nga alternatibo sa kurakot nga mga politiko. Niawhag gani sa iyang mga dumadapig pagboluntaryo ug pagda og kaugalingong bawon pagbantay sa mga presinto. Ang katigayonan makapatumaw sa pagduda diin gikan, krimen kay wa maapil sa iyang statement of assets, liabilities and net worth (SALN) ug labaw sa tanan tampok sa bukubuko sa mga nag-idolo niya.
- Latest
