13% ra’ng laslas sa plite
Gipaabot ang dakong laslas sa presyo sa gasolina ug ubang produkto sa lana sunod semana. Maayo ning balita alang sa mga motorista nga nahiagom sa tulo ka sunudsunod nga semana sa pagsaka sa presyo sa krudo ug kerosene ug duha ka semana sa gasolina. Dason sa pasidaan sa mga eksperto nga magpadayon ang pagtidlom sa presyo sa lana.
Sa labing uwahing kuwentada, niabot na og kapin sa 75 percent ang naiban sa presyo sa lana sunod sa pagsulbong pag-ayo sa presyo niadtong Hunyo 2014 – gikan sa $108 matag baril nitibugsok sa $26 matag baril. Ang presyo sa lana karong semanaha mao ang kinaubsan sukad niadtong 2003, o 12 ka tuig na ang nilabay.
***
Hinaot nga ang padayong pagtidlom sa presyo sa lana makapahilom na sa mapahimuslanon nga transport groups nga hangtod karon nilalis pa ug ang uban gani nisupak gihapon sa laslas sa minimum nga plitehan sa public utility jeepneys (PUJs). May sukaranan ang mga pasahero pagpangayo og mas dakong us-os sa plitehan.
Gamay ra kaayo ang P1 nga kinatibuk-ang laslas sa plitehan sa PUJs sa niaging usa ug tunga ka tuig (13 percent ra sa karaang minimum nga P7.50) kun itandi sa $81 matag baril nga nawagtang sa kalibotanong presyo sa lana (75.7 percent na sa presyo sa lana nga $108 matag baril 18 ka buwan ang nilabay).
***
Pasiunang banabana sa mga nagtuon sa industriya sa lana nga motidlom ang presyo sa gasoline og dul-an P2 matag litro ug dul-an sa P1 matag litro ang laslas sa presyo sa krudo ug kerosene sugod sa karong Martes, Pebrero 16. Ang aktuwal nga laslas sa presyo pormal nga ipahibawo sa higanteng mga kompaniya sa lana karong Lunes.
Mapuslanon ning maong kasayuran pagtudlo sa mga motorista sa tukmang panahon sa pagpatubil sa ilang mga sakyanan. Kun makalahutay pa ang mga tangke sa ilang mga sakyanan, mas maayo nga karon nang Martes mamalit og gasolina ug ubang produkto sa lana.
***
Nitidlom ang presyo sa lana bisan niubos sa produksiyon sa lana sa Estados Unidos, nga gibasol sa pagpabaha sa sobrang lana sa merkado sa kalibotan. Ang naiban sa produksiyon sa mga Amerikanhon sobra pa sa natapakan sa pagsulbong sa produksiyon sa Organization of Petroleum Exporting Countries.
Tulo ka sakop sa OPEC ang nipaburot sa produksiyon sa lana: Ang Iran nga nakalingkawas na sa oil embargo sa United Nations nipabaha og tulo ka milyon ka baril matag adlaw sa Enero kun itandi sa 80,000 ka baril niadtong Disyembre; ang Iraq nipausbaw sa ilang produksiyon ngadto sa 4.3 milyones ka baril matag adlaw; ug ang Saudi Arabia agresibong nanalipod sa iyang bahin sa kalibotanong merkado pinaagi sa pagdugang sa produksiyon sa lana.
- Latest
