Tipig sa puntil sa kampanya

Bisan sa sukwahi nga tambag sa iyang mga higala, usa ka dakong haligi sa pribadong sektor nisud sa kalibotan sa politika. Nidagan siya pagka kongresista batok sa incumbent nga daghan og napundohan nga mga proyekto sa iyang distrito, wa mahilambigit og mga eskandalo ug busa dako og kahigayonan nga mapili pag-usab.

Niinsistir sa iyang determinasyon pagpabarug sa bag-ong matang sa politika, masaligon siya nga mapasabot ang utokan nga mga botante sa distrito sa katarung sa iyang kawsa. Gituohan nga nakakumbinser niya pagdagan mao ang nag-unang kandidato pagka presidente nga nabantog sa nasudnong makinarya sa kampanya. Apan nakahukom nga nagkinahanglan siya og poste sa distrito kay ang incumbent aktibong nangampanya alang sa higpit niyang kaatbang.

* * *

Bisan sa gipasalig nga abundang pundo, nagmingaw ang kampanya sa bag-ong kandidato pagka kongresista. Hingpit siyang nagsalig sa mga boluntaryo nga nakumbinser sa iyang kawsa. Apan nakaplagan bisan sa labing lunod-patay nga mga boluntaryo nga ang kawsa di makapalahutay sa kampanya.

Dihang wa igkita ang gipasalig nga mga sakyanan nga mohatod nila sa kabaranggayan ug dihang wa mangabot ang gisaad nga mga pagkaon alang sa mga nanglibot sa kabalayan sa tibuok adlaw, nangaluya sila. Nahibung sila nganong nagpatugatuga man og dagan ang ilang idolo nga wa man diay ikagasto sa kampanya gawas sa kalantip niyang mopasabot sa ilang kawsa?

* * *

Natubag ang ilang kahibung pagkahuman sa kampanya. Napilde ang ilang kandidato apan nakapatukod og dakong bay. Nakahibawo na bang daan nga wa siyay dag-anan sa incumbent busa wa na lang mag-usik og gasto sa kampanya? O pagtigom gyod og pundo alang sa personal nga kabulahanan ang tumong sa kandidatura?

Ang kandidato nga atong gihisgutan sa ibabaw di maoy una ug di maoy kataposan ning usa sa mga raket sa piniliay nga gitawag sa bugoy sa sunod eskina nga "running for the fund of it." Magbaha ang kuwarta sa nasudnong mga kandidato ug kandidata matag kampanya ug nagkinahanglan sila og mga tsuwawap nga moabiba nila sa matag lungsod, dakbayan, lalawigan ug distrito.

* * *

May politikanhong pamilya sa Sugbo nga maoy kasagarang tinubdan sa tensiyon kay nag-unay sa nangaging mga piniliay: Mga kadugo ang nag-ilog sa nagkalainlaing katungdanan sa ilang teritoryo.

Apan sa eleksiyon karong Mayo 9, nahilom ang usa ka sanga sa pamilya. Wa na moatbang sa incumbent nilang mga paryente. Nahilot na ba ang ilang panagsungi. Nakab-ot na ba gyod ang dugay nang gitinguha nga panaghiusa? Kasaligan nakong tinubdan nagbutyag nga pabilin ang away sa mga sakop sa pamilya. Nakamatngon na lang ang lokal ug nasudnong mga politiko nga mga alyado nila sa daghan na uyamot nga mga piniliay nga panguwarta ray tuyo sa nangagi nilang kandidatura kay wa gyod diay maningkamot pagdaog.