Biyahe pa more

Laguindingan Airport, Misamis Oriental--Naghinam-hinam kong nibiyahe dinhi pakigtagbo sa gikamingawan nakong kadugo. Gamay pa kong bata nga kataposang nakataak ning bahina sa Mindanao. Daghan na sang uyamot nga katuigan nga nangligid sukad sa kataposan namong panagkita sa akong kadugo.

Pila ka adlaw sa wa pang biyahe, bisan kinsa na lay akong gipangutana, online ug offline, unsay labing lamiang mga kan-anan dinhi. Wa koy igong higayon sa pagsuroy. Apan determinado nga mangita gyod og panahon sa pagtilaw sa gikamingawan nga mga putahe sa amihanang Mindanao. Wa koy bisan gamay na lang ideya nga di diay ingon ana kasayon ang pag-abot dinhi.

***

Labing sayon nga bahin sa biyahe mao ang pag-book sa akong flight sa Cebu Pacific online. Gipili ang labing sayo nga flight aron nga makabalik sa Sugbo sa samang adlaw. Tungod sa kabarato sa plite, nipili ug nibayad pa gyod ko og labing duol ug sayon nga mga lingkoranan.

Sa wa pa matug niadtong Sabado sa gabii, nisuway ko og check-in online. Pakyas ang pila nako ka pagsuway. Nihukom kong matug og sayo aron di maglisod og mata inigka ugma. Apan nakadawat kog text gikan sa Cebu Pacific nga kanselado ang akong flight. Wa kong kalusot sa ilang mga numero ug social media accounts.

***

Nagsugod nang akong kulba. Kay nakapamalit na sa mga pagkaon sa Sugbo nga giingon sa akong kadugo nga iyang namingawan. Naghilas-hilas pa ko og post sa Facebook sa letrato sa akong mga napalit ug nangutana unsay akong nalimtan.

Labihang daghana ang nitubag nga nauwaw ko nga mas daghan pa diay ang mas lamiang mga pagkaon ang akong nalimtan. Kon tumanon hinuong tanang gilista,morag magkinahanglan ko og daghang biyahe. Maayo na lang nga may niulug-ulog nga ang kataas sa lista sa mga nalimtan nagmatuod unsa kaadunahan ug kaabunda sa mga grasya ang Sugbo.

***

Gipawong nakong alarm clock aron makamata sa naandang oras. Niadto ko sa Mactan-Cebu International Airport sayo gahapon sa buntag aron pagsusi unsay sunod nga flight nga akong masakyan. Ang labing sayo kinahanglan pang moagi sa Ninoy Aquino International Airport. Maong tibuok buntag ang naggasto una ko nakaabot dinhi.

Nalipay ang akong kadugo sa tanan nakong sinugatan. Apan sa tugkaran ra mi sa airport nagkita kay nahadlok siyang matanggong ko sa trapiko kon mosuroy pa sa Cagayan de Oro City. Di gyod diay maayo nga pasobrahan ang atong hunahuna. Tinuod diayng sungog sa katiguwangan nga kon gusto kang mokatawa ang Ginoo, pagplano. Bisan gihatagan ko sa Cebu Pacific of voucher para sa libreng biyahe tungod sa kanseladong flight, gikuyawan gihapon kong nagsuwat ini kon mahinayon ba ang akong biyahe balik sa Mactan. Sa tukmang oras.