Busay ug manok Bisaya

Usa sa nakadani sa pagtagad sa mga magsisibya sa Sugbo nga nagkatapok niadtong Biyernes sa gabii mao ang pangangkon sa dakong opisyal sa Artsidyosesis sa Sugbo nga ang pagtan-aw og busay makapabata. Sa di pa ko mohatag og dugang detalye, gamayng pasabot:

Lisod tapukon ang gatosan ka magsisibya (nanambong mi sa induction sa mga opisyal sa Kapisanan ng mga Brodkaster ng Pilipinas Cebu Chapter ug sa paghangop sa mga bag-ong nipasar sa KBP accreditation exam). Mas lisod nga dapiton ang ilang pagtagad (kay tagsa rang magkita, di sila hutdan og istorya; ug kay pulos magsisibya, mas dagko usahay ang ilang tingog kay sa among mga dinapit).

***

Nakadani sa ilang pagtagad ang klarong pasiaw ni Msgr. Vicente Rey Penagunda, vicar general sa artsidyosesis, kinsa nipahibawo nga nakapahigugma niya pag-ayo sa Sugbo mao ang 15 ka busay sa habagatan. Human siya ihulagway ni Atty. Cynthia Barte, standards authority officer sa KBP Cebu, nga mas bata kay sa iyang pangedaron, nangangkon si Msgr. Penagunda nga 12 na ka busay ang iyang naduaw.

Mahimong nataha ang mga magsisibya sa katungdanan ni Penagunda (pangabaga siyang Cebu Archbishop Jose Palma). O kay siya man say rector sa Seminario Mayor de San Carlos, ang nahimutangan sa IEC Pavilion, nipasidungog lang sa kalamposan sa IEC. O tingali gimingaw lang ang hamtong nga mga magsisibya sa ilang kabatan-on.

***

Nakahibawo kong daghan ang busay sa habagatang Sugbo apan nakugang ko sa sulti ni Msgr. Penagunda nga niabot og 15. Mokumpisal ko nga tulo pa ang akong naduaw (mao tingaling mas bata tan-awon si Msgr. Penagunda) ug nagtinguha unta sa pagduaw sab sa uban.

Naungot ko kay nasabligan og bugnaw nga panagana ang kainit sa akong tinguha nga mosuroy una sa akong kaugalingong nataran sa di pa molangyaw sa ubang mga dapit. Ang hinungdan? Gihilasan ko dihang nahibaw-an nga usa sa mga busay ginganlan sunod sa asawa sa mayor sa lungsod nga nahimutangan.

***

Sa tulo nga akong nakit-an (Mantayupan sa Barili, Tumalog sa Oslob ug Aguinid sa Samboan), ang kinauwahian maoy labi nakong ganahan. Pulos matahom ang tulo, pulos makapalambo sa gugma sa kinaiyahan, apan mas halandumon gyong Aguinid.

Di tungod sa lima niya ka andana (kutob ra ko sa ikaduha) kon dili tungod sa manok Bisaya nga gitanyag sa mga nanugat nga ihawon nilang daan aron makaon na inig naog namo. Wa igdungog ang Tangbo, Samboan sa ilang manok, apan lisod kalimtan ang kalami sa nag-asong tinowang manok Bisaya sa among pagpanggawas. Ambot gikapoy ug gitugnaw ba lang mi, o maayo lang gyong mangluto ang taga-Tangbo. Nagplano ming mamalik sa Aguinid, di lang tungod sa busay ug manok Bisaya. Tingali diay og tinuod ang pangangkon ni Msgr. Penagunda.