Dangog ug hanap
Bisperas sa pagduaw ni Bise Presidente Jejomar Binay sa Sugbo, nipasalig si Cebu City Mayor Mike Rama nga mohapit sila sa Arangkada sa DYAB Abante Pa, Bisaya! alas-7:30 sa buntag gahapon. Apan pila ka oras dayong tugpa sa iyang ayroplano sa Mactan-Cebu International Airport, nanawag ang iyang buhatan pagpasidaan nga mahimo di na sila makahapit sa sibyaanan.
Kay alas-8:30 sa buntag na motugpa ang iyang flight. Mahimong malangay pa tungod sa kahuot sa Ninoy Aquino International Airport. Kon mohapit sa ABS-CBN Broadcast Complex sa Jagobiao, Mandaue City, nabalaka silang malangay sa gitakda niyang pag-abot sa Cebu Coliseum diin nagpaabot ang iyang mga lider ug mga dumadapig.
***
Nitanyag hinuon sila nga magpa-interview si Binay pinaagi sa telepono. Nipasalig nga manawag dayon sa sibyaanan inig kawas gyong Binay sa ayroplano. Klaro hinuong napugos lang. Nagsige og pasabot nga si Mayor Rama ang nagsige og pahinumdom nila nga kinahanglang magpa-interview gyod si Binay sa Arangkada.
Gipasaligan namo ang mga kawani ni Binay nga hingpit ming nakasabot. Di sayon ang pagduma sa nasudnong kampanya. Dunay mas dagkong mga butang nga angayng unahon pag-atiman ni Binay. Sama sa pagtubag sa seryusong mga pasangil sa pangurakot batok niya. Nipasalig si Rama nga gawasnon kong mangutana ni Binay mahitungod sa bisan unsang kontrobersiya.
***
Gituman gyong pasalig. Klarong mao pa gyoy pagkawas ni Binay sa ayroplano sa pagpanawag nila sa Arangkada. Naklaro namong di pa andam si Binay pagpanubag sa among mga pangutana. Wa katabang ang nagputul-putol nga signal sa gigamit nilang mobile phone.
Nahugno hinuon mi sa kakuwang niya og kasayuran: Di pa siya andam nga mopahibawo sa panagpares nilang Senador Gringo Honasan ("Sa Lunes na, kasi pinag-uusapan pa") ni kinsay iyang mga kandidato sa pagka senador (si Alma Moreno ray iyang nanganlan), wa sab kahibawo may uban pa bang senatoriable gikan sa Kabisay-an. Dihang among gipangutana nganong di sila magka-pares si Senador Bongbong Marcos, igo lang nitubag nga wa magkatakdo ang ilang panglantaw.
***
Wa sab kahatag si Binay og detalye unsaon pagpatuman ang iyang giawhag nga pagpakigsawo sa Internal Revenue Allotment sa adunahang mga dakbayan ngadto sa kabos nga local government units. Labaw pang wa kahibawo unsay mga proyekto nga iyang pasiugdahan sa Sugbo ug Kabisay-an kon siyay makalingkod sa Malakanyang (nagbalikbalik lang sa panginahanglan sa decentralization).
Dihang nisuway mi og tuki sa mga pasangil sa pangurakot batok niya, igo rang gisubli ni Binay ang iyang pagpasabot nganong wa siya moatubang sa Senado kay natubag na niya ang tanang mga pasangil. Sa laktod, wa siyay bag-o nga igsusulti. Wa mi nakitang panginahanglan pag-inat pa sa interview. Wa na mi labot nga dayong udtong tutok nang nakaabot sa iyang destinasyon.
- Latest
