Kaligdong ni Robredo
Klarong nakaginhawa og luag silang Presidente Noynoy Aquino, kanhi DILG Secretary Mar Roxas ug ubang kadagkoan sa Liberal Party sa pagsugot ni Kongresista Leni Robredo pagdagan pagka bise presidente. Kay maglisod sila og pasabot sa mga botante kon human sila gisalikway ni Senador Grace Poe balibaran na sab ni Robredo.
Klaro hinuon nga hangyo-lubo ang nahitabo. Wa nila hatagi si Robredo og laing kapilian. Gawas nga silang Aquino ug Roxas ang nangunay paghangyo niya, gipasidan-an pa gyod sa ubang kadagkoan sa partido nga wa silay laing gitanyagan nga mo-pares ni Roxas. Nabantang hinuon nga di pa andam si Robredo sa nasudnong entablado.
***
Way makakuwestiyon sa pagkausab sa hunahuna ni Robredo. Human nikumpisal nga di andam ang iyang panghunahuna ug nga wa siyay nasudnong makinarya, way makalalis sa iyang pangangkon nga nakumbinser siya ug tulo niya ka anak babaye human pangutan-a ang ilang kaugalingon unsay buhaton ni anhing Jesse Robredo kon nahimutang sa samang kalibogan.
Labaw nang way makalalis ni Robredo sa pagkutlo sa iyang bana ug ni Aquino nga lisod ang pagkatug sa gabii kon nahibawo kang may ikatampo alang sa nasud ug sa katawhan apan giusikan o gibalibaran gyod ang kahigayonan sa pagserbisyo. Kon nabira pataas ni Aquino ang ratings ni Roxas mahimong matapakan sang dakong biya ni Robredo sa nakabuylo niyang mga kaatbang.
***
Ambot tungod ba sa kakuwang sa pangandam, o gipasundayag nang Robredo ang ka-independente sa iyang panghunahuna, may mga pamahayag si Robredo nga nakapanlipaghong sa dagway sa kadagkoan sa LP:
•Sa iyang paghangop sa mga nag-tsinelas nga wa makakuyog sa ilang kalihokan sa maksaysayanon nga Club Filipino, bakikaw nga nipasiklap ang mga nanambong sa sinaw ug mahalon nilang mga sapatos nga dakong eskandalo kon itandi sa yanong liderato sa nag-tsinelas nga si anhing Jesse Robredo;
• Sa iyang pagdeklarar nga hingpit nga ihatag ang iyang kaugalingon, gigilokan ang kadagkoan sa partido nga nahilambigit sa eskandalo sa pagpasayaw og hapit nga maghubo nga babayeng dancers sa birthday party sa ilang sinaligan sa Laguna;
• Sa iyang pagpasabot sa dako uyamot nga panagana pagsud sa hugaw nga kalibotan sa politika, morang napugwat ang kadagkoan sa partido nga luyo sa lahap nga pangangkon sa pagpadayon sa "daang matuwid," mao ang laksot nga politikanhong mga maniobra.
***
Mahimong mas andam na si Robredo sa mosunod niyang tungtong sa entablado karong nahuwasan na sa linigwatay pagtalikod sa iyang distrito ug paglayat sa usa sa labing organisado nga nasudnong kampanya. Hinaot nga inay magpalamoy ug magpa-undayon sa unsay naandan, sabligan ni Robredo ang umaabot nga piniliay sa lab-as nga pisik sa tinuorayng kaligdong.
Nga, kon nakalimot silang Aquino ug Roxas, maoy gibarugan sa namatay niyang bana.
- Latest
