Nahikawan tungod sa away
Upat ka tuig human sa pagkanselar sa duha ka flyover projects sa amihanang distrito sa Dakbayan sa Sugbo, nagsige pa ang tinulisokay nilang Mayor Mike Rama ug kanhi Mayor Tommy Osmeña. Nipasidaan si Osmeña nga mosamot kahuot sa trapiko tungod sa pagbabag ni Rama sa mga flyover. Sa iyang bahin, nipasabot si Rama nga gisalikway niyang mga proyekto kay nagduda nga nakadawat og dagkong komisyon ang mga tigpasiugda. Nahadlok si Osmeña nga kon magkamang nang mga sakyanan sa Lahug ug kasilinganang mga barangay molayas ang Business Process Outsourcing companies nga nakahatag sa lokal nga ekonomiya og binilyon ka pesos sa suholan ug mga benepisyo sa kapin 100,000 ka call center agents.
***
Sa labing unang higayon, gibutyag ni Rama giunsa niya pagbabag ang mga flyover nga orihinal nga giduso ni Kongresista Raul del Mar ug gipadayon sa nipuli niya nga si kanhi Kongresista Cutie del Mar niadtong 2011. Si Rama nga maoy tsirman sa Regional Development Council sa Central Visayas gipatawag ni Presidente Noynoy Aquino sa Malakanyang tungod ug alang sa kontrobersiyal nga proyekto. Nitambong sa tulo ka oras nga tigom gawas nilang Aquino ug Rama silang Mar Roxas, nga maoy Transportation Secretary niadtong higayona, Kalihim Rogelio Singson sa Department of Public Works and Highways, si Cutie ug tanang undersecretaries sa DPWH.
***
Human sa tigom, niasoy si Rama nga nagpakiluoy niya si Aquino nga di na lang babagan ang proyekto. Apan gipasabot siyang Rama nga di niya kabudhian ang Movement for a Livable Cebu ug ang iyang kaugalingong baruganan nga di angayng tukoran og dugang flyovers ang Sugbo kay maggusbat ang makasaysayanon ini nga panagway. Dihang nabungkag nang tigom, giapas ni Roxas si Rama ug gitanyagan og compromise: Subway ang tukuron duol sa Asilo dela Milagrosa ug ang flyover adto na lang pabarugon sa eskina Imus ug Gen. Maxilom. Apan nibalibad gihapon si Rama.
***
Pag-abot niya sa tugpahanan dayong pauli sa Sugbo, nikumpisal si Rama nga diha pa siyang katugkad sa implikasyon sa iyang pagbarug batok sa flyovers: Mahimong iya nang ikaaway ang duha ka labing dagkong opisyal sa nasud, silang Aquino ug Roxas. Wa hinuon kabatyag si Rama nga gidumtan siyang Aquino. Naklaro ni sa pag-aprobar ni Aquino sa P10.6 bilyones nga Bus Rapid Transit system, proyekto ni Osmeña nga gisuportahan ni Rama. Apan wa gyod pundohi ni Aquino ang iyang gisugyot nga mga alternatibo sa flyovers: Pagpalapad sa kadalanan, pagtukod og flared intersections ug pagpatuman sa Comprehensive Traffic Management Plan. May sukaranan ang bagulbol sa mga Sugbuanon. Kay sila ang nahikawan og mga proyekto nga gitagana na unta alang sa Sugbo tungod lang sa bugno sa ilang mga politiko.
- Latest
