Lalis sa CCMC
Kusganong gipanghimakak ni Kongresista Raul del Mar sa amihanang distrito sa Dakbayan sa Sugbo ang pasangil nga iyang gipugngan ang hinabang sa Department of Health sa pagtukod sa bag-ong Cebu City Medical Center. Tubag ni niya sa pasangil ni Mayor Mike Rama nga iyang gihulga si kanhi Health Secretary Enrique Ona nga apikihon sa gabinete kon motabang sa CCMC.
Nitug-an si Rama sa Arangkada sa DYAB Abante Pa, Bisaya! nga bisan ang nipuli ni Ona nga si Health Secretary Janette Garin nanagana sab og tabang. Matod ni Rama gisaaran siyang Garin og P50 milyones matag tuig apan di lang ipasaba sa ubang mga opisyal sa administrasyon.
***
Nisumbalik si del Mar nga dakong bakak ang pangangkon ni Rama nga wa siyay pagpakabana alang sa kabos nga mga pasyente sa dakbayan. Matod ni del Mar ang labing dakong bahin sa iyang pork barrel, sa wa pa ibasura sa Korte Suprema ang Priority Development Assistance Fund, gitugyan niya sa DOH alang sa medical assistance ug ubang panginahanglan sa kabos nga mga pasyente.
Matod ni del Mar si Rama maoy sad-an sa pagbabag sa iyang mga proyekto alang sa labing nagkinahanglan nga mga Sugbuanon. Iyang gitumbok ang pagsupak ni Rama sa pagtabang unta sa DOH pagpalambo sa wa na kapusli nga Guba Community Hospital sa bukirang barangay sa Guba.
***
Laing nireklamo nga gibabagan sang Rama ang iyang mga proyekto mao si Kongresista Bebot Abellanosa sa habagatang distrito sa Dakbayan sa Sugbo. Nipasangil si Abellanosa nga gipanghudlat ni Rama ang mga kontraktor sa nasubasta na untang sentro alang sa senior citizens nga may kakulian sa panglawas sa Barangay Labangon.
Nipuno si Abellanosa nga gihasi sang Rama ang kontraktor sa pag-semento sa V. Rama Avenue. Matod ni Abellanosa klarong mga dumadapig sa mayor ang mga batan-on nga nibato sa mga trabahante ug makinarya sa kontraktor. Nipasidaan si Abellanosa nga modangop na sa korte ug sa katawhan kon babagan gihapon ni Rama ang umaabot niyang mga proyekto.
***
Nireklamo si Rama nga wa siyay nadawat nga tabang gikan sa duha ka kongresista sa dakbayan pagpatuman sa mahinungdanon niyang mga proyekto. Matod niya maayo pa si Kongresista Benhur Salimbangon kay nigiya pa unsaon pagkuha og tabang gikan sa nasudnong gobyerno.
Sa iyang bahin, nipasabot si del Mar nga nakuha niyang mga proyekto sa nasudnong mga ahensiya tungod sa pagkumbinser sa ilang kadagkoan sa kadinalian sa mga proyekto ug paghikay sa tanang gikinahanglang dokumento. Matod niya way mahimo kon pulos ra pagarpar. Nagkauyon silang del Mar ug Abellanosa pagsukmat ni Rama nganong gidalidali pagguba ang CCMC, nga kapuslan pa unta bisan human sa linog niadtong 2013, nga wa pa man diay alternatibong ospital.
- Latest
