Sentido kumon sa taxi
Sa kataposan, human sa pito ka sunudsunod nga buwan sa pagtidlom sa presyo sa lana, ug human sa kapin sa duha ka buwan nga protesta sa mga pasahero sa taxi, nadutlan na gyo’ng Land Transportation Franchising and Regulatory Board (LTFRB) ug nimando na og P10 nga laslas sa plitehan sa mga taxi.
Isugod pagpatuman ang laslas karong Lunes, Marso 9, dinhi sa Sugbo ug ubang bahin sa Pilipinas. Aron pagtino nga way lalis nga moulbo tali sa taxi drivers ug mga pasahero, nipasidaan ang LTFRB nga dakpon, ikiha ug silotan ang mga drayber nga moinsistir lang gihapon sa mas taas nga plitehan. Di hinuon madasigon nga timaan ang kataphaw nga gipasundayag sa LTFRB sa niaging mga semana.
***
Tungod ba kaha kay wa damha ang pagtibugsok sa presyo sa lana sa merkado sa kalibotan sukad niabot sa iyang kinatas-an nga ang-ang niadtong Hunyo sa niaging tuig, ang LTFRB maoy usa sa labing wa makaandam sa paglaslas sa plitehan aron makatilaw sa benepisyo sa baratong lana ang mga pasahero.
Wa mokihol ang LTFRB hangtod nga nipasaka og petisyon paglaslas sa plitehan sa public utility jeepneys (PUJs) si Kongresista Manny Iway sa Negros Oriental niadtong Oktubre. Kinahanglan pa sab nga mopasaka si Iway og buwag nga petisyon paglaslas sa plitehan sa taxis niadtong Disyembre una gisubli sa LTFRB ang flagdown rates.
***
Basaha ug hilaki ang mosunod nga kuwestiyonableng mga lakang sa LTFRB human nadawat ang mga petisyon sa laslas sa plitehan:
•Plitehan sa PUJs sa Metro Manila ray gilaslasan sa LTFRB niadtong Disyembre bisan klaro ang tumong ni Iway pag-awhag og laslas sa plitehan sa tibuok nasud;
•Enero karong tuiga na nalaslasan ang plitehan sa PUJs sa Sugbo ug Central Visayas ug mas uwahi pa gyud ang ubang rehiyon sa nasud; ug
•Wa dayon laslasi ang plitehan sa taxis kay gipaabot pa kon magsige na ba sab og saka ang presyo sa lana, hinikalimtan ang sobra sa katunga nga tidlom sa presyo sa lana.
***
Usa sa mga sukaranan sa taxi drivers ug operators pagsupak sa petisyon mao ang dakong gasto sa pag-recalibrate sa ilang metro. Nga mahimong mausik lang gawas nga mapatongan pa hinuon kun makabuylo ang pagmahal pagbalik sa lana. Bahala na nga nagkauyon ang mga eksperto nga di pa mahurot ang usa ka bilyon ka baril nga sobrang suplay sa lana sa mosunod nga unom ka buwan.
Maayo na lang nga sa kataposan gikunsaran sa sentido kumon ang LTFRB: Di usbon ang metro apan ibanan og P10 ang plitehan sa mga pasahero. Wa na gyo’y sukaranang mokisikisi ang mga drayber. Apan kun mosupak gihapong operators, mahimong igo lang nanalipod sa pagpahimus pagpaburot sa abangan sa ilang taxi units.
- Latest
