Human traffic barriers

Diha’ng napukan ang nagsugod na unta pagtuybo nga gamayng politikanhong dinastiya sa mga Cabulao sa Barangay Tisa sa Dakbayan sa Sugbo sa piniliay niadtong Oktubre 2013, ang mga dumadapig sa bag-ong kapitan way kabutangan sa ilang kalipay nga ang ilang pagsaulog wa mahuman sud lang sa pila ka adlaw.

Pagpatilaw sa dakong kausaban nga iyang mahimo ug ginamit ang gamhanan niyang koneksiyon sa City Hall isip kanhi chief of staff ni Mayor Mike Rama, si Phillip Zafra nipakatap og daghang traffic enforcers sa City Traffic Operations Management  pagduma sa trapiko. May gamay hinuong problema: Nisamot kagubot ang trapiko sa Tisa ug kasilinganang mga barangay.

***

Nabatasan na nako nga magbaktas gikan sa gi-lagaran nga sibyaanan matag gabii. Kon may hapiton ko sa tindahan, kinahanglan kong motabok sa nasudnong highway sa Consolacion una makatungas paingon sa among pinuy-anan. Para sa mga wa maanad, imposible ang paglusot sa way kinutoban nga baha sa buses, trucks, PUJs, pribadong awto ug motorsiklo. Apan human sa daghang katuigan nga praktis, kamao na kong motabok usa ka lakang matag higayon ug mopiyong lang kon mataliwad-an na sa higanteng mga sakyanan.

Karong bag-o, may traffic enforcer nang mopara sa tanang sakyanan aron makatabok mi. Manlipaghong ko sa kauwaw nga mabara ang gatosan ka nagsugat nga sakyanan kon ako rang usa ang motabok.

***

Pasaligan hinuon tika nga di ila lang sa Consolacion ug Cebu City kining maong anomaliya: Ang traffic enforcers nga mao untay gitahasan pagpahapsay sa trapiko nahimo na hinuong kabahin sa mga hinungdan sa pagkatanggong sa mga sakyanan.

Andam kong makigpustaanay sa mga tagduma sa trapiko sa Mandaue City: Kon way bangga apan mabara lang gihapon ang nagsugat nga molugsong ug motungas nga mga sakyanan duol sa eskina sa Canduman road, magpaputol ko sa nagkanipis na nakong buhok kon way traffic enforcer nga nagpataka lang og warawara sa taliwa sa nasudnong highway.

***

Di hinuon makiangayon ang pagtingob sa tulisok ngadto sa traffic enforcers. Gikinahanglan ang ilang presensiya sa kadalanan apan di sa tanang higayon. Daghan uyamot nga mga eskina ang makasinati og mas hapsay ug mas paspas nga pulipulihay sa mga sakyanan kon way magsamuksamok sa mga motorista.

Kinahanglang hunungon ang pagpanghatag og lisensiya sa mga drayber nga di ganing kamao mobasa sa traffic signs ug nagtuo nga ang yellow line agianan sa mga ambulansiya. Apan kinahanglan sang bansay-bansayon ang traffic enforcers nga tigpatuman sila sa mga lagda sa trapiko, di tigbara sa trapiko alang sa mga botante sa mayor ug ubang politiko, di tigpagawas ug tigpasud sa mga kustomers sa shopping malls, ug labaw nang di kakonsabo sa bagis nga dispatchers nga maghimo og instant terminals ug mangilkil sa mga drayber.

[email protected]