Walay ligoy-ligoy

Kun molihok lang g'yud unta ang mga sakop sa Prevention Restoration Order and Beautification Enhancement mahawan ug mahapsay g'yud ang atong dakbayan sa Sugbo.

Apan unsaon man gud, kini'ng mao nga grupo nga gipangulohan sa akong amiga nga si Raquel Arce wala man kaayo mopakita sa ilang labok. Gawas lang tingali og ang mayor na maoy momando kanila anha pa tingali magkara-kara.

Dili kita makapaabot nga si Mayor Michael Rama makahuna-huna sa tanang tukma nga pagahimuon kay dili man 'sab computer ang iyang utok. Ang akong nakat-onan kaniadto diha nga nahimo ko'ng department head sa DYLA, mao nga ang usa ka opisyal dili kinahanglang mag-agad kanunay unsay isugo kaniya sa iyang labaw.

Sayop 'sab nga kun adunay problema iya pa kini'ng ipaabot sa iyang labaw kun masulbad pa kini diha sa iyang level. Kana'ng magsuroy-suroy ko pagkadaghan nga angay'ng aksyonan.

Ang mga sinaligan ni Mayor Rama kuwang lang g'yud sa pagpakabana mao nga wala moabot sa ilang huna-huna ang tukma unta nga pagabuhaton. Angay'ng aksyonan sa PROBE kini'ng magkaromata nga mamaligya og prutas ilawom sa landong sa kahoy kilid sa karaang USP sa dalan V. Gullas.

Ang mga karomata makabalda sa pag-agi sa mga sakyanan diha sa mao nga dapit. Sa unahan, gikan sa eskena P. Burgos ug V. Gullas ang PROBE ug CITOM maoy angay nga moaksyon.

Ang daplin sa karsada gihimo na lang nga parking area sa mga sakyanan. Dunay tindahan nga namaligya og tubig diha sa V. Gullas nga ang ilang mga ginalon nga tubig anaa gipangbutang sa sidewalk apil ang ilang traysikad. Asa na man moagi ang mga tawo?

Sa aseras kilid sa Kaking, buyon sa D. Jakosalem, ang mga namaligya og DVD mipalapad na sa ilang pwesto ngadto sa aseras ug ang nagbantay anaa usab sagad maglingkod sa agianan sa mga tawo. Unsa, wala mo makakita niini taga PROBE?

Unya, kini'ng mga kahoy nga nanubo o kaha gituyo sa pagpatubo daplin sa karsada. Angay kini nga pangputlon sama niana'ng kahoy nga anaa mitubo kilid sa barandilya nga puthaw unahan og gamay sa Lahug Elementary School.

Angay usab unta nga putlan sa iyang mga sanga ang kahoy nga anaa daplin sa karsada paingon sa Lahug Market kay anha sa landong nianang mao nga kahoy magpunsisok ang mga habal-habal drivers nga nakahatag og kasamok sa trapiko.

Unya ang karsada Kamagong, kanang molugsong gikan sa duol sa Lahug Elementary School, angay usab nga hawanan ang daplin kay ang mga namuyo niini mihinay-hinay na pagsibog sa ilang koral paingon sa karsada.

Kun giatiman pa kana sa CITOM ang mao nga karsada, mamenus-menos unta ang problema sa trapiko sa Gorordo Avenue kay ang ubang sakyanan anha na man moagi diha.

Unsaon, gisugdan kana sa paghawan atol sa administrasyon ni Kanhi Mayor Tomas Osmeña apan kay naabtan sa pagkahuman sa iyang termino, wala mapadayon mao nga nagpabilin nga hagip-ot ang mao nga dapit.

Sa ako na nga giingon, kun ang mga opisyal ug kawani sa City Hall nga magsakay-sakay niana'ng ilang giisyu nga sakyanan mobuka pa lang unta sa ilang mga mata, siyaro og dili sila makakita og unsay tukma nga himuon.

Unsaon pagkakab-ot og katumanan sa gipasibantog ni Mayor Rama nga hapsayon ang gubot ug nindoton ang bati kun kamo nga mga sinweldohan sa kuwarta sa katawhan dili molihok?

Maayo lang ta ani sa sulti. Unya kun adunay interview sa media, puwerte nga manulti nga makadayeg g'yud ang maminaw. Akong lauman nga unta, tagdon ninyo ang mga isyu nga akong gihisgotan.

***

Nag-countdown na ang simbahan sa pagpahigayon sa 51st International Eucharistic Congress nga anhi himoa sa Cebu City unya sa sunod tuig. Hayan ra ba nga mobalik si Santo Papa sa nasud ug moanhi sa Sugbo.

Dili bitaw imposible nga pag-anhi ni Pope Francis dunay nagtinguha og dautan apan wala lang makalugar. Gimandoan g'yud ni DILG Secretary Mar Roxas ang kadagkoan sa kapolisan nga bantayan g'yud pag-ayo ang Papa.

Siguro ko nga kun moanhi si Pope Francis sa Sugbo ingon usab niini ang himuon ni Secretary Roxas nga mandoan g'yud ang kapolisan pagsiguro sa kaluwasan sa labaw'ng opisyal sa Katoliko. Lauman nato nga mobalik si Papa sa nasud.