Kampanya sa abling Wifi
Nagkinahanglan ka og wifi apan way internet sa imong mobile phone, o layo ra sa shopping mall, coffee shop ug restaurant nga nagtanyag og libreng access, unsa may imong buhaton? Mangita. Mas dako ang kahigayonan nga makakita sa mga dakbayan kay sa lagyong kalungsoran. Mahimong mas daling makakita sa mga dapit nga wa paabota. Mahimo sang wa gyoy makit-an.
Akong tuyo sa pagsuwat ini mao ang pagpahibawo nimo sa mga dapit nga may abling wifi nga akong natultolan. Sa panghinaot nga tug-anan sab ko nimo sa imong mga nahibaw-an. Ug tingali kasugdan natong kampanya pagdasig og dugang abli nga wifi sa Sugbo ug kasilinganang mga lalawigan.
***
Tuguting mosugilon una ko unsa kamapuslanon ang abling wifi. Gitawgan ko nga may mga dokumento nga dinaliang gikinahanglan sa among ulohang buhatan. Apan natanggong ko sa nabarang trapiko duol sa eskina A.S. Fortuna sa Mandaue City. Malipayon kong nakugang nga may abling wifi--wa magkinahanglan og password--ug naka-email sa mga dokumento sa wa magsugod og dagan ang mga sakyanan.
Nabasahan nako--pinaagi sa abling wifi--nga giluwatan kog arrest warrant tungod sa kasong libelo nga gipasaka ni kanhi gobernador Gwen Garcia samtang didto sa Hong Kong. Salamat sa libreng wifi, naka-istorya ang akong higalang mga abogado sa Sugbo nga pulos nipasalig nga di ko posasan inig tugpa sa Mactan.
***
Tungod sa daghang kalihokan sa Piyesta Senyor ug sa pagka-ospital sa akong bayaw, nagbalikbalik ko sa Dakbayan sa Sugbo sa niaging mga adlaw. Maong makasulti ko nimo nga may abling wifi sa mosunod nga mga dapit: Sa Gen. Maxilom Ave., labi na duol sa Iglesia ni Kristo; duol sa ganghaan sa minteryo sa Carreta; ug sa ikaupat nga andana sa Cebu Doctors' University Hospital.
Nahibawo kong mas daghan kang nahibaw-an. Palihug pahibaw-a ko aron nga mapahibawo sab nako ngadto sa mas daghan. Di aron nga yak-an ug abusohan. Kon dili aron kadangpan kon may dinaliang panginahanglan. Lisod pag-istar sa minteryo para lang libreng wifi.
***
Nganong di man ta magsugod og grupo? Nga gawas nga manglista sa mga dapit nga may abli nga wifi mangampanya pa gyod ta sa dugang mga kompaniya nga moabli sab sa ilang wifi aron pagsabwag og libreng internet access ngadto sa mga nagkinahanglan.
Labing dakong argumento batok sa kampanya mao ang kahigayonan nga abusohan, gamiton og dugay ug ilogan sa daghan, ug mokamang na hinuong internet connection sa manggihatagong mga kompaniya. Tinuod na sa mga dapit nga punsisokan sa daghang tawo sa tanang higayon, sama sa malls. Apan di sa mga kompaniya duol sa kadalanan nga malabyan lang. Mahimo pa ganing gamitong advertisement: Nganlan sa ilang serbisyo o produkto aron nga mapasalamaton ug mahinumdoman sa umaabot nilang mga kustomer.
- Latest
