Pataka sa LTFRB
Inay manghulga nga ikiha og undercharging ang bus drivers ug operators nga mangolekta og mas ubos nga plitehan kay sa gitakda sa ilang taripa, angayng hangpon sa Land Transportation Franchising and Regulatory Board ang talagsaong kahigayonan nga makapahimus ang mga pasahero og mas baratong plitehan.
Garbo maoy nagtukmod sa mga opisyal sa LTFRB sa pag-insistir nga kinahanglang tumanon ang ilang giluwatan nga taripa sa plitehan. Dakong binuang ang ilang panghudlat nga ang undercharging way kalainan sa overcharging. Nagmatuod lang nga, sama sa ubang mga opisyal nga gilamian sa pagpahimus sa ilang katungdanan, nakalimot ang kadagkoan sa LTFRB sa tinuorayng kapuslanan sa ilang buhatan.
* * *
Inay mangisog, angay ganing mangayo og pasaylo ang taga LTFRB sa dako nilang atraso ngadto sa mga pasahero. Ang pagboluntaryo sa bus operators sa Sugbo pagpangolekta sa mas ubos nga plitehan nagmatuod nga nasayop ang kuwentada sa LTFRB sa tukmang plitehan sa buses dinhi sa ato.
Kinaham nga pagarpar sa LTFRB nga ilang gimbuhaton ang pagbalanse sa mga interes sa mga drayber, operators ug mga pasahero. Apan napamatud-an sa kasinatian dinhi sa Sugbo ug Central Visayas, ug posibleng mao say nahitabo sa ubang bahin sa nasud, nga naghangad ra diay sila sa bungbong o gikutlo lang sa tumoy sa ilang buhok ang taripa sa plitehan nga ilang giumol.
* * *
Kay kon sakto pang kuwentada sa LTFRB, nganong nabuhi man ang bus operators ug drivers sa Sugbo bisan sa ilang pagsawom sa plitehan nga labihang ubosa kon itandi sa gitakda sa taripa? Gani, wa lang mabuhi, nilambo pa gyod ang operasyon sa mga kompaniya sa bus sa Sugbo.
Sa ato pa, wa diay magtugkad sa yuta ang kuwentada sa LTFRB. Wa diay ipasikad sa tinuod nga kahimtang sa kadalanan. Badlis-badlis lang diay tingali sa papel ang ilang gipasiugdahan. Mas mahinungdanon diay tingali alang sa LTFRB ang paggamit sa gahom pagtakda sa plitehan kay sa pagtino nga ang ilang hukom makiangayon sa tanang hingtungdan.
* * *
Human sa labing uwahing laslas sa presyo sa lana, niboluntaryo na sab ang mini bus operators sa Sugbo sa pagpahamtang og dugang laslas sa plitehan. Nipirma na sila og kauyonan uban ni Gobernador Junjun Davide. Ang rehiyonal nga buhatan sa LTFRB igo lang niingon nga kon aprobahan sa ilang ulohang buhatan motidlom dayon og piso ang minimum nga plitehan sa mini buses.
Kon may uwaw pang nahibilin sa kadagkoan sa LTFRB, angayng ilubong ang ilang mga ulo sa yuta. Mas maayo pang bus operators, nga mapaabot untang maneguro pagpaburot sa ilang ginansiya, kay nisimpatiya pa sa mga pasahero. Ang LTFRB nga maoy gisuweldohan sa mga pasahero pagpanalipod sa ilang interes nagpataka lang ug kinahanglan pa diayng tudloan unsaon pagtuman ang ilang trabaho.
- Latest
